អាមេរិក ៖ ដោយដកស្រង់សម្តីពីក្រុមមន្ត្រីអាមេរិក សារព័ត៌មាន Financial Times កាលពីថ្ងៃព្រហស្បតិ៍ (ទី១៤ ខែកញ្ញា) បានរាយការណ៍ថា រដ្ឋាភិបាលសហរដ្ឋអាមេរិកជឿជាក់ថា រដ្ឋមន្ត្រីការពារជាតិចិន លោក Li Shangfu កំពុងត្រូវបានស៊ើបអង្កេតដោយទីក្រុងប៉េកាំង និងត្រូវបានដកចេញពីតួនាទី។

សេចក្ដីរាយការណ៍នេះ បានកើតឡើងភ្លាមៗ មុនពេលអ្នកការទូតជាន់ខ្ពស់ លោក Rahm Emanuel ឯកអគ្គរដ្ឋទូតសហរដ្ឋអាមេរិកប្រចាំប្រទេសជប៉ុន បានលើកឡើងនៅលើបណ្ដាញសង្គម កាលពីល្ងាចថ្ងៃព្រហស្បតិ៍ តាមពេលវេលានៅទីក្រុងវ៉ាស៊ីនតោនថា គេ «មិនបានឃើញ ឬដឹងឮពីលោក Li អស់រយៈពេល ៣សប្តាហ៍»ហើយ ហើយបន្ថែមថា រដ្ឋមន្រ្តីរូបនេះ ប្រហែលជាត្រូវបានឃុំខ្លួន នៅក្នុងផ្ទះ។

នេះគឺជាការលេចឡើងនូវសញ្ញាចុងក្រោយបំផុតនៃភាពចលាចលដែលអាចនឹងកើតមាន នៅក្នុងទីក្រុងប៉េកាំង បន្ទាប់ពីរដ្ឋមន្ត្រីការបរទេសចិន លោក Qin Gang បានបាត់មុខជាសាធារណៈយ៉ាងចម្លែក និងត្រូវបានដកចេញពីតំណែង កាលពីខែកក្កដា។ ដូចគ្នាដែរ ក្នុងខែកក្កដានោះ ប្រទេសចិនក៏បានប្ដូរមេដឹកនាំនៃកងកម្លាំងរ៉ុក្កែត ជាអង្គភាពកងទ័ពដែលត្រួតពិនិត្យឃ្លាំងអាវុធនុយក្លេអ៊ែររបស់ខ្លួន ដោយអតីតមេបញ្ជាការ លោក Li Yuchao បានបាត់ដំណឹងអស់ជាច្រើនសប្តាហ៍ នៅមុនពេលមានការផ្លាស់ប្តូរនេះ ហើយប្រព័ន្ធផ្សព្វផ្សាយផ្លូវការ Xinhua មិនបានផ្តល់ការពន្យល់អ្វីនោះឡើយ សម្រាប់ការបញ្ចប់តួនាទីរបស់លោកនេះ។

ចំណែកឯសារព័ត៌មាន «The Times» បានរាយការណ៍ថា មន្ត្រីសហរដ្ឋអាមេរិក ៣នាក់ ក៏ដូចជាបុគ្គល ២នាក់ផ្សេងទៀត ដែលបានផ្ដល់បទសម្ភាសន៍ខ្លីៗពីការស៊ើបការណ៍សម្ងាត់ បានប្រាប់ថា សហរដ្ឋអាមេរិកបានសន្និដ្ឋានថា លោក Li ត្រូវបានដកហូតតួនាទីជារដ្ឋមន្ត្រីហើយ។

គួរបញ្ជាក់ដែរថា លោក Li បានធ្វើដំណើរទៅកាន់ប្រទេសរុស្ស៊ី កាលពីខែសីហា ដើម្បីចូលរួមសន្និសីទសន្តិសុខមួយនៅក្បែរទីក្រុងម៉ូស្គូ កាលពីថ្ងៃទី១៥ ខែសីហា។ ២ថ្ងៃក្រោយមករដ្ឋាភិបាលនៃប្រទេសបេឡារុស បានចេញផ្សាយរូបថតដែលលោក Li ជួបជាមួយប្រធានាធិបតីបេឡារុស លោក Alexander Lukashenko នៅទីក្រុងមីនស្ក៍។ លោកត្រូវបានគេឃើញលើកចុងក្រោយ នៅទីក្រុងប៉េកាំង កាលពីថ្ងៃទី២៩ ខែសីហា ពេលថ្លែងសុន្ទរកថានៅក្នុងវេទិកាសន្តិសុខជាមួយបណ្តាប្រទេសអាហ្វ្រិក៕