អ្នកស្រុកអ៊ីស្រាអែល បានរៀបចំនាទីចុងក្រោយ ដើម្បីអបអរឆ្នាំថ្មីរបស់ជនជាតិជ្វីហ្វ នៅផ្សារមួយ ក្នុងទីក្រុងហ៊្សេរុយសាឡិម នៅថ្ងៃសុក្រ (ទី១៥ ខែកញ្ញា) នេះ។

អ្នកដើរទិញឥវ៉ាន់ កំពុងស្ថិតនៅផ្សារដ៏ខាន់មួយ ក្នុងទីក្រុងហ៊្សេរុយសាឡិមភាគខាងលិច ដើម្បីទិញគ្រឿងទេស សម្រាប់ថ្ងៃឈប់សម្រាករបស់ជនជាតិជីហ្វរយៈពេល ២ថ្ងៃ។

អំឡុងមុនពិធីចូលឆ្នាំថ្មីនេះ គេសង្កេតថា មានការអធិដ្ឋានពិសេស ដោយខ្លះធ្វើឡើង នៅមុខជញ្ជាំងភាគខាងលិច ដែលជាកន្លែងដ៏ពិសិដ្ឋបំផុត សម្រាប់ជនជាតិជីហ្វ នៅទីក្រុងចាស់របស់ក្រុងហ៊្សេរុយសាឡិម។

ជាមួយគ្នានេះ គេឃើញថា យោធាអ៊ីស្រាអែលបានរឹតបន្តឹងសន្តិសុខ សម្រាប់ថ្ងៃបុណ្យរបស់ជនជាតិជ្វីហ្វនេះ ដោយបង្ខំបិទផ្លូវនានាទាំងស្រុង មិនឲ្យមានការចេញចូលពីសំណាក់ជនជាតិប៉ាឡេស្ទីនដែលរស់នៅក្នុងតំបន់កាន់កាប់វ៉េសប៊ែង ព្រមទាំងច្រកឆ្លងកាត់តំបន់ហ្គាហ្សាផងដែរ។ នៅក្នុងសេចក្តីថ្លែងការណ៍មួយ ពួកយោធាបានឲ្យដឹងថា ការរឹតបន្តឹងការធ្វើដំណើរនឹងមានរយៈពេល ២ថ្ងៃ ពីថ្ងៃទី១៥ ដល់ថ្ងៃទី១៧ ខែកញ្ញា ដោយអាស្រ័យទៅលើការវាយតម្លៃលើស្ថានភាព៕