ស្វាយរៀង៖ នាយឧត្តមសេនីយ៍កិត្តិសង្គហបណ្ឌិត គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា តំណាងដ៏ខ្ពង់ខ្ពស់សម្ដេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា នៅថ្ងៃទី១៥ ខែកញ្ញា ឆ្នាំ២០២៣នេះ បានធ្វើការជំរុញឲ្យស្ថាប័នពាក់ព័ន្ធទាំងអស់ត្រូវចេញបណ្ណក្រីក្រ បណ្ណហានិភ័យ និងចេញបណ្ណកម្មសិទ្ធិជូនដល់អតីតយុទ្ធជន គ្រួសារយុទ្ធជនពលី ពិការ គ្រួសារក្រីក្រពិតប្រាកដ ដែលទទួលបានលំនៅដ្ឋានចំនួន ៤០០ ខ្នងផ្ទះ ស្ថិតនៅភូមិជីកដី ឃុំអណ្ដូងត្របែក ស្រុករមាសហែក ខេត្តស្វាយរៀង។

នាយឧត្តមសេនីយ៍កិត្តិសង្គហបណ្ឌិត មានប្រសាសន៍ដូច្នេះក្នុងឱកាសដែលអញ្ជើញចុះពិនិត្យ និងសួរសុខទុក្ខដល់បងប្អូនដែលជាអតីតយុទ្ធជនក៏ដូចជាក្រុមគ្រួសារអតីតយុទ្ធជនពលី មរណៈ និងគ្រួសារក្រីក្រ ដែលទទួលបានលំនៅដ្ឋានចំនួន ៤០០ ខ្នងផ្ទះដែលជាអំណោយរបស់សម្ដេចតេជោ ហ៊ុន សែន និងសម្ដេចគតិព្រឹទ្ធបណ្ឌិត ប៊ុន រ៉ានី ហ៊ុន សែន តាមរយៈសមាគមអតីតយុទ្ធជនកម្ពុជា និងក្រសួងសង្គមកិច្ច អតីតយុទ្ធជន និងយុវនីតិសម្បទា។

នាយឧត្តមសេនីយ៍កិតិ្តសង្គហបណ្ឌិត ថ្លែងថា អង្គភាពដែលមានការពាក់ព័ន្ធទាំងអស់ត្រូវធ្វើបច្ចុប្បន្នភាពជាមួយក្រុមគ្រួសារយុទ្ធជនពលី ក៏ដូចជា អតីតយុទ្ធជន និងគ្រួសារប្រជាពលរដ្ឋក្រីក្រពិតប្រាកដ។ ក្នុងនោះ ត្រូវមានអត្តសញ្ញាណប័ណ្ណត្រឹមត្រូវតាមលក្ខខណ្ឌ ដើម្បីស្នើទៅក្រសួងចេញបណ្ណកម្មសិទ្ធិជូនពួកគាត់ជៀសវាងលក់ដូរ ឬយកទៅបញ្ចាំធ្វើឲ្យបាត់បង់កេរ្តិ៍ដំណែលរបស់សម្ដេចតេជោ បើមានការខ្វះខាតសមាគម ឬមន្ទីរជុំវិញខេត្តត្រូវជួយដល់អ្នករងគ្រោះពិតប្រាកដ ដើម្បីដោះស្រាយជូនពួកគាត់។

លើសពីនេះ តាមរយៈការលំបាកខាងលើមេភូមិ មេឃុំ ត្រូវតែជួយដោះស្រាយជាបន្ទាន់ទៅតាមលទ្ធភាពដែលយើងមានព្រមទាំងត្រូវរាយការណ៍ទៅសាខាកាកបាទក្រហមខេត្ត ស្រុកថ្នាក់ដឹកនាំខេត្ត ដើម្បីជួយដោះស្រាយ និងអន្តរាគមន៍។

នាយឧត្តមសេនីយ៍កិត្តិសង្គហបណ្ឌិត បន្ថែមថា ក្រុមប្រឹក្សាឃុំត្រូវប្រជុំគ្នាដើម្បីទុកថវិកាឃុំ-សង្កាត់ខ្លះសម្រួលដោះស្រាយនៅពេលជួបគ្រោះមហន្តរាយបើខ្វះខាតត្រូវសុំសប្បុរសជនបន្ថែមទៀត។ ក្រៅពីនេះមន្ទីរអង្គភាពនានាជុំវិញខេត្តត្រូវជ្រើសរើសរកពូជដំណាំគ្រប់ប្រភេទដើម្បីឲ្យប្រជាពលរដ្ឋធ្វើការដាំដុះទៅតាមលទ្ធភាព ក្នុងការថែទាំភូមិមួយផលិតផលមួយទោះបីពួកគាត់ចេញទៅរកស៊ីនៅខាងក្រៅក៏ដោយក៏ដំណាំទាំងនោះបានផ្ដល់ផលអោយពួកគាត់យកទៅលក់ ដើម្បីដោះស្រាយជីវភាពគ្រួសារផងដែរ៕ ដោយ ÷ ឧត្តម