បន្ទាយមានជ័យ៖ កាលពីយប់មិញអគ្គីភ័យបានឆាបឆេះជាខាងលើបង្អស់នៃសណ្ឋាគារ មីងឌូ នៅប៉ោយប៉ែត មកដល់ព្រឹកនេះ អភិបាលខេត្តបានបញ្ជាក់ថា មិនមានមនុស្សរងគ្រោះថ្នាក់នោះទេ។

ឯកឧត្តម អ៊ុ រាត្រី អភិបាលខេត្តបន្ទាយមានជ័យបានប្រាប់ BTV នៅព្រឹកថ្ងៃទី១៦ ខែកញ្ញា ឆ្នាំ២០២៣នេះថា នៅថ្ងៃទី១៥ ខែកញ្ញា ឆ្នាំ២០២៣ វេលាម៉ោង ២១និង ៣០នាទីយប់ មានករណី អគ្គីភ័យឆាបឆេះនៅជាន់លើបង្អស់ នៃអគារសណ្ឋាគារមីងឌូ ស្ថិតនៅភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ករណីនេះគឺបណ្ដាលមកពីការឆ្លងចរន្តអគ្គិសនី។

ឯកឧត្តម បន្ថែមថា នៅក្នុងប្រតិបត្តិការពន្លត់នេះ ​លោកដឹកនាំបញ្ជារួមដោយផ្ទាល់ ដោយមាន​កម្លាំងចម្រុះចូលរួមប្រមាណ ១៥០នាក់ លទ្ធផលអគ្គីភ័យត្រូវបានពន្លត់ឱ្យរលត់ទាំងស្រុង នៅវេលាម៉ោង ​២២ និង ៥០នាទីថ្ងៃដដែល។

ឯកឧត្តម អុំ រាត្រី បញ្ជាក់ថា ក្រោយកើតហេតុកម្លាំងជំនាញបានរុករក ​និងស្រាវជ្រាវភ្លាមៗ គឺមិនមានមនុស្សណាម្នាក់ជាប់ក្នុងអគារ ឬរងគ្រោះថ្នាក់នោះឡើយ គ្រាន់តែមានការខូចខាត​សម្ភារៈមួយចំនួននៅលើដំបូលអគារ។

ឯកឧត្តម បានថ្លែងការអរគុណដល់កងកម្លាំង ​និងវិស័យឯកជន ក៏ដូចជាភាគី​ថៃដែល​ចេញ​រថយន្តពន្លត់អគ្គិភ័យមកជួយ ​និងបានក្ដាប់គ្រប់គ្រង​សភាពការណ៍បានទាន់ពេលវេលា៕អត្ថបទ ៖ ប្រាក់ វ៉ាន់ដា