សហព័ន្ធអន្តរជាតិ នៃកាកបាទក្រហម និងសង្គមអឌ្ឍចន្ទក្រហម បាននិយាយកាលពីថ្ងៃសៅរ៍ថា មនុស្សជាង ៨សែននាក់ នៅក្នុងប្រទេសលីប៊ីបានរងផលប៉ះពាល់ដោយទឹកជំនន់ដែលត្រូវបានបង្កឡើងដោយព្យុះមេឌីទែរ៉ាណេ ដានីយ៉ែល(Daniel) និងបានវាយប្រហារភាគខាងកើតប្រទេសលីប៊ីកាលពីសប្តាហ៍មុន។

កាកបាទក្រហមបាននិយាយថា ចំនួននេះគឺស្មើនឹងប្រមាណ ១១,៤ ភាគរយនៃចំនួនប្រជាជនលីប៊ី។

នៅថ្ងៃដដែល អង្គការសុខភាពពិភពលោក (WHO) បាននិយាយថា ខ្លួនបានរកឃើញ និងបញ្ជាក់អត្តសញ្ញាណសាកសពជនរងគ្រោះចំនួន ៣.៩៥៨នាក់ហើយ។

ទោះបីជាកិច្ចខិតខំប្រឹងប្រែងជួយសង្គ្រោះនៅតំបន់ដែលរងគ្រោះមហន្តរាយធ្ងន់ធ្ងរជាងគេនៅភាគខាងកើតប្រទេសលីប៊ីត្រូវបានរារាំងដោយឧបសគ្គ និងមានសង្ឃឹមតិចតួចសម្រាប់ពួកគេក្នុងការស្វែងរកអ្នកនៅរស់យ៉ាងណាក្ដី ក្រុមអ្នកជួយសង្គ្រោះទាំងនៅក្នុងប្រទេស និងក្រៅប្រទេសនៅតែខិតខំប្រឹងប្រែងស្វែងរកក្នុងគំនរបាក់បែកដ៏ធំ។

មជ្ឈមណ្ឌលជាតិគ្រប់គ្រងជំងឺរបស់ប្រទេសលីប៊ីកាលពីថ្ងៃសៅរ៍បានប្រកាសថាតំបន់នានាដែលរងផលប៉ះពាល់ដោយទឹកជំនន់បានចូលទៅក្នុងស្ថានភាពអាសន្នផ្នែកសុខភាពរយៈពេលមួយឆ្នាំ។

អង្គការសហប្រជាជាតិបានអំពាវនាវដោយសង្ឃឹមថានឹងរៃអង្គាសប្រាក់បានជាង ៧១ លានដុល្លារដើម្បីជួយប្រជាជនដែលរងផលប៉ះពាល់ដោយគ្រោះមហន្តរាយនេះ៕