អតីតប្រធានាធិបតីអាមេរិក លោក Donald Trump បាននិយាយថា លោកបាន​ច្រាន​ចោល​គំនិត​ របស់ក្រុមមេធាវីផ្ទាល់របស់លោក ក្នុងការ​បន្ត​ប្រឆាំង​នឹង​ការ​បរាជ័យ​ការ​បោះឆ្នោត​កាល​ពីឆ្នាំ​២០២០ របស់លោក ដោយសារតែលោកមិនគោរពលទ្ធផលទាំងនោះ ដោយ​បាន​និយាយ​នៅ​ក្នុង​បទ​សម្ភាសន៍​មួយ​ដែលបានចាក់ផ្សាយកាលពីថ្ងៃអាទិត្យថា លោកបានគិត​ដោយ​ខ្លួន​ឯង​ថា ​ការបោះឆ្នោតត្រូវបាន​លួចបន្លំ ជាការអះអាងមិនពិតដែលលោកបន្តធ្វើ។

លោក Trump ដែល​ជា​បេក្ខជន​នាំ​មុខ​សម្រាប់​ការ​តែងតាំង​ក្នុង​គណបក្ស​សាធារណរដ្ឋ ដើម្បី​ប្រកួត​ប្រជែង​ជាមួយលោកប្រធានាធិបតី Joe Biden មកពីគណបក្ស​ប្រជាធិបតេយ្យ​នៅ​ឆ្នាំ​២០២៤​ខាង​មុខ នៅពេលនេះ កំពុងប្រឈមកាត់​ទោស​ព្រហ្ម​ទណ្ឌ​ចំនួ​ន​៤​រួម​ទាំង​២​ករណី​ពាក់ព័ន្ធ​នឹង​ការបង្វែរលទ្ធផលឆ្នោតដែលលោកបានចាញ់លោក Biden កាលពីឆ្នាំ២០២០។   

លោក Trump បានប្រាប់កម្មវិធី"Meet the Press"របស់ទូរទស្សន៍ NBC ថា ការបោះ​ឆ្នោត​នេះ​ត្រូវ​បាន​លួចបន្លំ ប្រឆាំងនឹងរូបលោក ។

លោក Trump នៅតែបន្តអះអាង​ខុស​ពី​ការ​ពិត​ដែល​ថា​ការ​បោះឆ្នោត​នេះ​ត្រូវ​បាន​លួច​ចេញពី​លោក តាមរយៈ​ការ​លួចបន្លំសន្លឹកឆ្នោតដ៏ច្រើន។

ពេលត្រូវ​បានសួរពីមូលហេតុដែលលោកបានច្រានចោលគំនិតរបស់ក្រុមមេធាវីនៅសេតវិមាន និង​យុទ្ធនាការ​បោះឆ្នោតរបស់លោក ដែលលោកបានបរាជ័យនោះ លោក Trump បានឆ្លើយថា ព្រោះ​ខ្ញុំ​មិន​គោរពលទ្ធផលទាំងនោះ។

លោក Trump បានផ្ដល់ចម្លើយពីភាពគ្មានទោសគ្រប់ករណីចោទបទព្រហ្មទណ្ឌទាំងអស់ រួមទាំងការកាត់ទោសនៅក្នុងទីក្រុងវ៉ាស៊ីនតោន និងរដ្ឋចចា ៕