លីប៊ី ៖ មន្ទីរពេទ្យតាមមូលដ្ឋានបារាំង ត្រូវបានដំឡើងនៅក្នុងទីក្រុង Derna ប្រទេសលីប៊ី ដើម្បីផ្តល់ការថែទាំសុខភាពដល់អ្នករស់រានដែលរងរបួសនៅក្នុងទឹកជំនន់ ។ 

 ទូរទស្សន៍លីប៊ី Al Masar បានចាក់ផ្សាយវីដេអូកាលពីថ្ងៃអាទិត្យ ឃើញសំពត់តង់ជាច្រើន ត្រូវបានដំឡើងនៅកណ្តាលវាល ដោយក្រុមសុខភាពបារាំង កំពុងរៀបចំខាងក្នុង ដើម្បីចាប់ផ្តើមប្រតិបត្តិការជួយសង្រ្គោះរបស់ពួកគេ ។ 

 មនុស្សរាប់ម៉ឺននាក់ ត្រូវបានគេព្រួយបារម្ភថា បានស្លាប់ ក្រោយទំនប់ ២កន្លែងនៅលើទីក្រុង Derna បានបាក់កាលពីថ្ងសទី ១០ ខែកញ្ញាកន្លងទៅ បំផ្លិចបំផ្លាញប្លុករស់នៅរបស់អ្នកស្រុកស្ថិតតាមបាតទន្លេរីងស្ងួត ពេលដែលពួកគេកំពុងដេកលង់លក់ ។  

 យោងតាមការអះអាងរបស់អង្គការសហប្រជាជាតិ(UN) បានឲ្យដឹងថា សាកសពមនុស្សជាច្រើន ត្រូវបានហូរនាំយកទៅក្នុងសមុទ្រ ហើយមនុស្សជាង ១ពាន់នាក់ ត្រូវបានបញ្ចុះរួចទៅហើយនៅក្នុងផ្នូរដ៏ធំមួយ ។ 

 ប្រទេសលីប៊ី បានអំពាវនាវសុំជំនួយអន្តរជាតិ ក្រោយទឹកជំនន់សម្លាប់មនុស្សរាប់ម៉ឺននាក់ ក្នុងនោះមនុស្សជាច្រើននាក់ទៀត កំពុងបាត់ខ្លួន ។  

 ការិយាល័យសម្របសម្រួលកិច្ចការមនុស្សធម៌(OCHA) របស់ UN បាននិយាយថា មនុស្សយ៉ាងហោច ១១.៣០០នាក់ បានស្លាប់ និងមនុស្សជាង ១ម៉ឺននាក់ទៀត កំពុងបាត់ខ្លួននៅក្នុងទីក្រុង Derna ក្រោយព្យុះ Daniel បោកបក់លើតំបន់សមុទ្រមេឌីទែរ៉ាណេ និងបោកបក់ទៅកាន់ទីក្រុងមួយនេះ និងតំបន់តាំងលំនៅផ្សេងទៀតនៅតាមឆ្នេរសមុទ្រ ៕