កូរ៉េខាងជើង ៖ កូរ៉េខាងជើង និយាយថា ដំណើរទស្សនកិច្ចចុងក្រោយរបស់មេដឹកនាំរបស់ខ្លួន លោក គីម ជុងអ៊ុន ទៅកាន់ប្រទេសរុស្ស៊ី បាននាំមកនូវការវិវឌ្ឍថ្មីដ៏សំខាន់បំផុត នៅក្នុងប្រវត្តិសាស្ត្រ ដែលឈានទៅរកការរីកចម្រើនកាន់តែខ្លាំងឡើង ក្នុងទំនាក់ទំនងទ្វេភាគី។

លោក គីម បានចាប់ផ្តើមធ្វើដំណើរវិលត្រឡប់ទៅប្រទេសរបស់លោកវិញ បន្ទាប់ពីបានទៅមើលសាកលវិទ្យាល័យសហព័ន្ធចុងបូព៌ា (Far Eastern Federal University) និងកន្លែងផ្សេងទៀត នៅចុងបូព៌ានៃទីក្រុងវ៉្លាឌីវ៉ូស្តុក (Vladivostok) របស់ប្រទេសរុស្ស៊ី កាលពីថ្ងៃអាទិត្យ (ទី១៧ ខែកញ្ញា)។ ហើយនៅថ្ងៃចន្ទ (ទី១៨ ខែកញ្ញា) នេះ ទីក្រុងព្យុងយ៉ាងបានបង្ហាញជាសាធារណៈតាមរយៈរូបថតរបស់ទូរទស្សន៍មជ្ឈិមកូរ៉េដែលគ្រប់គ្រងដោយរដ្ឋនូវពិធីជូនដំណើរលោក គីម ដែលធ្វើឡើងនៅស្ថានីយរថភ្លើង ហើយលោក គីម ចេញដំណើរតាមរថភ្លើងពិសេសរបស់លោក។

អំឡុងដំណើរទស្សនកិច្ចរបស់លោកទៅកាន់សាកលវិទ្យាល័យ នៅព្រឹកថ្ងៃនោះ តាមសេចក្តីរាយការណ៍ លោក គីម បានសម្តែងក្តីសង្ឃឹមថា ទស្សនកិច្ចលើកនេះនឹងដើរតួនាទីយ៉ាងសំខាន់ ក្នុងកិច្ចសហប្រតិបត្តិការរវាងប្រទេសរបស់លោក និងរុស្ស៊ី ក្នុងវិស័យវិទ្យាសាស្ត្រ និងបច្ចេកវិទ្យា។

ចំណែកទីក្រុងព្យុងយ៉ាង លើកឡើងនៅក្នុងរបាយការណ៍ព័ត៌មានថា ដំណើរទស្សនកិច្ចលើកដំបូងរបស់លោក គីម ទៅកាន់ប្រទេសរុស្ស៊ីលើកដំបូង ក្នុងរយៈពេល ៤ឆ្នាំនេះ បានជួយពង្រឹងទំនាក់ទំនងទ្វេភាគីជាប្រពៃណី និងបានចាប់ផ្ដើមបង្កើតឲ្យមាននូវដំណាក់កាលថ្មីមួយ ក្នុងដំណើរវិវឌ្ឍរបស់ប្រទេសទាំង២។

សូមបញ្ជាក់ដែរថា នេះគឺជាដំណើរទស្សនកិច្ចទៅក្រៅប្រទេសលើកដំបូងរបស់មេដឹកនាំនៃប្រទេសឯកោមួយនេះ គិតចាប់តាំងពីមានការរីករាលដាលនៃជំងឺរាតត្បាតកូវីដ-១៩។ ហើយការធ្វើដំណើរនេះ កើតឡើងនៅមុនខួបនៃការបង្កើតគណបក្សពលករកូរ៉េ ដែលកំពុងកាន់អំណាច នាខែក្រោយ៕