អុីតាលី ៖ ប្រធានគណៈកម្មការសហភាពអឺរ៉ុប លោកស្រី Ursula von der Leyen កាលពីថ្ងៃអាទិត្យ (ទី១៧ ខែកញ្ញា) បានទៅទស្សនកិច្ចកោះ Lampedusa របស់ប្រទេសអ៊ីតាលី ដែលកំពុងប្រឹងប្រែងដោះស្រាយជាមួយនឹងការកើនឡើងនៃការមកដល់របស់ជនអន្តោប្រវេសន៍ ហើយក្នុងដំណើរនោះ លោកស្រីបានសន្យាថា នឹងរៀបចំឲ្យមាននូវផែនការសកម្មភាពរបស់សហភាពអឺរ៉ុបចំនួន ១០ចំណុច ដើម្បីជួយជាជំនួយដល់អ៊ីតាលីដោះស្រាយស្ថានការណ៍នេះ។

មកដល់ពេលនេះ ក្នុងឆ្នាំនេះ ជនអន្តោប្រវេសន៍ចំនួន ១២៦.០០០នាក់ បានមកដល់អ៊ីតាលី ដែលចំនួននេះ ស្ទើរតែកើនឡើងទ្វេដងនៃចំនួនដូចគ្នា ក្នុងឆ្នាំ២០២២។ កោះដ៏តូច Lampedusa ថ្មីៗនេះ បានឃើញនូវការកើនឡើងយ៉ាងខ្លាំងនៃចំនួនមនុស្ស ដែលធ្វើដំណើរមកតាមទូក ដោយមានមនុស្សមកដល់ជាង ៧.០០០នាក់ នៅសប្តាហ៍នេះ ដែលច្រើនជាងចំនួនប្រជាជនរស់នៅអចិន្ត្រៃយ៍របស់កោះនេះទៅទៀត។

លោកស្រី Von der Leyen ត្រូវបានអមដំណើរដោយនាយករដ្ឋមន្ត្រីអ៊ីតាលី លោកស្រី Giorgia Meloni ហើយរថយន្ត ដែលកំពុងដឹកថ្នាក់ដឹកនាំទាំងនោះទៅកាន់មជ្ឈមណ្ឌលជនអន្តោប្រវេសន៍របស់កោះ Lampedusa ត្រូវបានរារាំងមួយភ្លែត ពីសំណាក់អ្នកស្រុក ដែលតវ៉ាជុំវិញបន្ទុកដែលកោះនេះកំពុងប្រឈមជាមួយ។

បន្ទាប់ពីដំណើរទស្សនកិច្ចទៅកាន់មជ្ឈមណ្ឌលនេះ លោកស្រី von der Leyen ដែលត្រូវបានគេរំពឹងថា នឹងឈរឈ្មោះសម្រាប់អាណត្តិទី២ នៅពេលដែលអាណត្តិរបស់លោកស្រីផុតកំណត់នៅឆ្នាំក្រោយនោះ បានដាក់ចេញនូវ«ផែនការសកម្មភាព» ១០ចំណុច ដើម្បីជួយសម្រាលសម្ពាធលើអ៊ីតាលី ជាកន្លែងដែលជនអន្តោប្រវេសន៍ភាគច្រើនមកពីឆ្នេរសមុទ្ររបស់អាហ្វ្រិកខាងជើង តាមទូក។

ក្នុងផែនការនេះ ក៏មានរួមបញ្ចូលការប្រើប្រាស់ទីភ្នាក់ងារព្រំដែនខាងក្រៅរបស់សហភាពអឺរ៉ុប Frontex ដើម្បីកំណត់អត្តសញ្ញាណជនអន្តោប្រវេសន៍ ដែលមកដល់ប្រទេសអ៊ីតាលី និងធ្វើមាតុភូមិនិវត្តន៍អ្នកដែលមិនមានសិទ្ធិជ្រកកោន៕