ម៉ាឡេស៊ី៖ រដ្ឋាភិបាលបានប្រកាសកាលពីថ្ងៃសុក្រថា ប្រទេសម៉ាឡេស៊ីនឹងដាក់ក្រោមការបិទក្រុងនៅទូទាំងប្រទេស ខណៈករណីជំងឺ Covid-19 ប្រចាំថ្ងៃបានកើនឡើងជាង ៨,០០០ករណី។
ការិយាល័យនាយករដ្ឋមន្ត្រីម៉ាឡេស៊ី និយាយនៅក្នុងសេចក្ដីថ្លែងការណ៍ថា នៅក្នុងដំណាក់កាលដំបូងនៃការបិទក្រុងដែលចូលជាធរមានចាប់ពីថ្ងៃទី១ ដល់ថ្ងៃទី១៤ ខែមិថុនា គ្រប់វិស័យសេដ្ឋកិច្ច និងសង្គមមិនត្រូវបានអនុញ្ញាតឲ្យធ្វើប្រតិបត្តិការឡើយ លើកលែងសេវាកម្មសេដ្ឋកិច្ចសំខាន់ៗ។ ជាមួយនឹងការកើនឡើងនាពេលថ្មីៗនូវករណីប្រចាំថ្ងៃ សមត្ថភាពរបស់មន្ទីរពេទ្យនៅជុំវិញប្រទេសដែលព្យាបាលអ្នកជំងឺ Covid-19 ត្រូវបានកំណត់ចំនួនកើនឡើង។ រដ្ឋាភិបាលនឹងធានាពីប្រព័ន្ធសុខភាពសាធារណៈមិនឲ្យដួលរលំ គាំទ្រ និងផ្តល់ជំនួយដល់ក្រសួងសុខាភិបាល ដើម្បីបង្កើនសមត្ថភាពមន្ទីរពេទ្យនៅក្នុងប្រទេសទាំងមូល។ រដ្ឋាភិបាលនិយាយថា នឹងធ្វើការដើម្បីបង្កើនអត្រាការចាក់វ៉ាក់សាំង និងប្រកាសកញ្ចប់ជំនួយជួយដល់ប្រជាជន វិស័យសេដ្ឋកិច្ចដែលរងការប៉ះពាល់ដោយសារការបិទក្រុង។
ប្រសិនបើករណីប្រចាំថ្ងៃបង្ហាញនិន្នាការថយចុះជាបន្តបន្ទាប់ បន្ទាប់ពីរយៈពេល ១៤ថ្ងៃ សកម្មភាពសេដ្ឋកិច្ចនឹងត្រូវអនុញ្ញាតឲ្យធ្វើប្រតិបត្តិការ។ ប្រទេសម៉ាឡេស៊ីបានមើលឃើញពីការកើនឡើងការឆ្លងជំងឺ Covid-19 ថ្មីនៅក្នុងសប្ដាហ៍ថ្មីៗនេះមានកំណត់ត្រាខ្ពស់ចំនួន៨,២៩០ករណីត្រូវបានរាយការណ៍នៅថ្ងៃសុក្រ ដែលនាំឲ្យករណីសរុបនៅក្នុងប្រទេសកើនដល់ ៥៤៩,៥១៤ករណី ហើយអ្នកស្លាប់ចំនួន ៦១នាក់ត្រូវបានរាយការណ៍ នាំឲ្យកំណើនអ្នកស្លាប់កើនដល់ ២,៥៥២នាក់។
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
