អ្នកជំនាញUNម្នាក់ បាននិយាយនៅថ្ងៃចន្ទនេះថា ស្ថានភាពសិទ្ធិមនុស្សនៅក្នុងប្រទេសរុស្ស៊ី បានធ្លាក់ចុះកាន់តែ ខ្លាំងឡើង ចាប់តាំងពីប្រទេសនេះ បានឈ្លានពានអ៊ុយក្រែនកាលពីខែកុម្ភៈឆ្នាំមុន ដោយពណ៌នាអំពី«ការបង្ក្រាបជាប្រព័ន្ធ»លើអង្គការសង្គមស៊ីវិល។

ច្បាប់ចម្លងនៃរបាយការណ៍ដែលឃើញដោយសារព័ត៌មានរ៉យទ័រ បាននិយាយថា៖«អាជ្ញាធររុស្ស៊ី បានកាត់បន្ថយយ៉ាងខ្លាំងនូវសេរីភាពនៃសមាគម ការជួបប្រជុំគ្នាដោយសន្តិវិធី និងការបញ្ចេញមតិ ទាំងតាមអ៊ីនធឺណិត និងក្រៅបណ្តាញ ហើយបានធ្វើឲ្យប៉ះពាល់ដល់ឯករាជ្យភាពរបស់តុលាការ និងការធានានៃការកាត់ក្តីដោយយុត្តិធម៌» ។

របាយការណ៍នោះ បានឲ្យដឹងទៀតថា ទណ្ឌកម្មផ្នែករដ្ឋបាលជាបន្តបន្ទាប់ កំពុងត្រូវបានអនុវត្តតាមអំពើចិត្តប្រឆាំងនឹងក្រុមអ្នកប្រឆាំង និងកម្លាំងដែលត្រូវប្រើប្រឆាំងនឹងអ្នកតវ៉ាដោយសន្តិវិធី។

របាយការណ៍របស់អ្នករាយការណ៍ពិសេសនេះ គឺជាលើកទីមួយហើយដែលក្រុមប្រឹក្សាសិទ្ធិមនុស្ស (HRC) ដែលមានអាយុ១៦ឆ្នាំ ត្រូវបានផ្តល់សិទ្ធិឲ្យពិនិត្យមើលកំណត់ត្រាសិទ្ធិរបស់សមាជិកមួយក្រុម ដែលហៅថា «P5» ដែលមានអាសនៈអចិន្ត្រៃយ៍នៅក្រុមប្រឹក្សាសន្តិសុខ។ ពុំមានការអត្ថាធិប្បាយភ្លាមៗពីបេសកកម្មការទូតរុស្ស៊ី នៅទីក្រុងហ្សឺណែវទេ។