ប្រភពមួយបានឲ្យដឹងថា ប្រទេសអ៊ីរ៉ង់ និងសហរដ្ឋអាមេរិក ត្រូវបានជូនដំណឹងថា មូលនិធិរបស់ប្រទេសអ៊ីរ៉ង់ ដែលត្រូវបានបង្កកចំនួន ៦ពាន់លានដុល្លារ ត្រូវបានផ្ទេរទៅគណនីធនាគារនៅក្នុងប្រទេសកាតាហើយ ដោយដំណឹងនេះ បង្កឲ្យមានការរៀបចំយ៉ាងប្រុងប្រយ័ត្ន នៅថ្ងៃចន្ទ (ទី១៨ ខែកញ្ញា) នេះ ក្នុងការផ្លាស់ប្ដូរអ្នកជាប់ឃុំចំនួន ៥នាក់ដូចគ្នា រវាងគូអារិដ៏ធំទាំង២។

អ្នកនាំពាក្យក្រសួងការបរទេសអ៊ីរ៉ង់លោក Nasser Kanaani បាននិយាយថា មូលនិធិដែលត្រូវផ្អឹបទុក នៅប្រទេសកូរ៉េខាងត្បូង នឹងស្ថិតនៅក្នុងកម្មសិទ្ធិរបស់អ៊ីរ៉ង់ នៅថ្ងៃចន្ទនេះ ដូច្នេះកិច្ចព្រមព្រៀងដែលសម្របសម្រួល ដោយប្រទេសកាតា អំឡុងកិច្ចចរចាជាច្រើនខែ អាចដំណើរការទៅមុខបាន។ តែពាក់ព័ន្ធនឹងករណីនេះ មិនទាន់មានការអត្ថាធិប្បាយជាសាធារណៈភ្លាមៗរបស់សហរដ្ឋអាមេរិកទេ។

យ៉ាងណាក្ដី នៅក្រោមកិច្ចព្រមព្រៀងនេះ ជនជាតិអាមេរិកចំនួន ៥នាក់ ដែលមានសញ្ជាតិ២ ត្រូវបានគេរំពឹងថា នឹងចាកចេញពីទីក្រុងតេអេរ៉ង់ ហើយឆ្ពោះទៅកាន់រដ្ឋធានីដូហារបស់ប្រទេសកាតា បន្ទាប់មកហោះហើរពីទីនោះទៅកាន់សហរដ្ឋអាមេរិកតែម្ដង។

ជាថ្នូរមមកវិញ នឹងមានការដោះលែងជនជាតិអ៊ីរ៉ង់ ៥នាក់ ដែលត្រូវបានឃុំខ្លួន នៅសហរដ្ឋអាមេរិក។ អ្នកនាំពាក្យក្រសួងការបរទេសអ៊ីរ៉ង់ បាននិយាយថា ក្នុងចំណោមទាំង ៥នាក់នោះ ២នាក់នឹងត្រឡប់ទៅអ៊ីរ៉ង់វិញ ខណៈដែល ២នាក់នឹងបន្តស្នាក់នៅសហរដ្ឋអាមេរិកតាមការស្នើសុំរបស់ពួកគេ ហើយអ្នកជាប់ឃុំម្នាក់ទៀតនឹងរួមរស់ជាមួយគ្រួសាររបស់ខ្លួន នៅក្នុងប្រទេសទី៣។

កិច្ចព្រមព្រៀង ដែលត្រូវបានប្រកាសជាសាធារណៈលើកដំបូង កាលពីថ្ងៃទី១០ ខែសីហា នឹងជួយសម្រាលភាពមិនចុះសម្រុងបានខ្លះៗ រវាងទីក្រុងវ៉ាស៊ីនតោន និងទីក្រុងតេអេរ៉ង់ បើទោះបីជាភាគីទាំង២ នៅតែមានការខ្វែងគំនិតយ៉ាងខ្លាំងក្លា ជុំវិញបញ្ហាជាច្រើន រាប់ចាប់ពីមហិច្ឆតានុយក្លេអ៊ែររបស់អ៊ីរ៉ង់ និងឥទ្ធិពលរបស់ប្រទេសនេះ នៅជុំវិញតំបន់ រហូតដល់ការដាក់ទណ្ឌកម្មរបស់សហរដ្ឋអាមេរិក និងវត្តមានយោធាអាមេរិក នៅក្នុងតំបន់ឈូងសមុទ្រ៕