ភាគហ៊ុនរបស់ក្រុមហ៊ុនអភិវឌ្ឍន៍អចលនទ្រព្យ Evergrande Group របស់ប្រទេសចិន ដែលកំពុងជួបបញ្ហា ធ្លាក់ចុះ ២៥ភាគរយ ក្នុងពេលដែលទីផ្សារបានបើកការជួញដូរក្នុងទីក្រុងហុងកុង នៅថ្ងៃចន្ទ (ទី១៨ ខែកញ្ញា) នេះ បន្ទាប់ពីមានការចាប់ខ្លួនបុគ្គលិកជាច្រើននាក់របស់ក្រុមហ៊ុន ដែលកំពុងរួបរឹតដោយបំណុលយ៉ាងច្រើន ក្នុងប្រទេសចិនមួយនេះ។
តម្លៃភាគហ៊ុនរបស់ក្រុមហ៊ុន Evergrande បានធ្លាក់ចុះដល់ ០,៤៧ដុល្លារហុងកុង (ប្រមាណជា ០,០៦០ដុល្លារអាមេរិក) ក្នុងការជួញដូរ នាពេលព្រឹក ដែលជាតម្លៃទាបបំផុត ក្នុងរយៈពេល ២សប្តាហ៍។ សម្រាប់ការធ្លាក់ចុះនេះ បើគេគិតត្រឹមម៉ោង ១០ព្រឹក ម៉ោងក្នុងស្រុក គឺធ្លាក់ចុះ ១១ភាគរយ ដោយធ្លាក់ចុះ ០,៩ភាគរយ នៅក្នុងសន្ទស្សន៍របស់ក្រុមហ៊ុនអចលនទ្រព្យ Hang Seng។
ការធ្លាក់ចុះនេះកើតឡើង ២ថ្ងៃបន្ទាប់ពីនគរបាលនៅទីក្រុង Shenzhen ភាគខាងត្បូងប្រទេសចិន បាននិយាយនៅក្នុងសេចក្តីថ្លែងការណ៍ថា បុគ្គលិកជាច្រើនរូបនៃក្រុមហ៊ុនបុត្រសម្ព័ន្ធហិរញ្ញវត្ថុ Evergrande គឺ Evergrande Wealth Management ត្រូវបានចាប់ខ្លួន។
អាជ្ញាធរមិនបានបញ្ជាក់ចំនួនបុគ្គលិក ឬការចោទប្រកាន់អ្វីលើពួកគេនោះទេ ខណៈសេចក្តីថ្លែងការណ៍បានអំពាវនាវឲ្យសាធារណជនរាយការណ៍ករណីណាមួយនៃការសង្ស័យថា មានការក្លែងបន្លំ។
សូមបញ្ជាក់ថា Evergrande ដែលជាក្រុមហ៊ុនអភិវឌ្ឍន៍អចលនទ្រព្យជំពាក់បំណុលគេច្រើនបំផុតលើពិភពលោក ដោយមានបំណុលប៉ាន់ស្មានចំនួន ៣២៨ពាន់លានដុល្លារអាមេរិក កាលពីចុងខែមិថុនា បានជាចំណុចសំខាន់នៃវិបត្តិទីផ្សារ ដែលកាន់តែអាក្រក់ទៅៗរបស់ប្រទេសចិន ដោយធ្វើឲ្យកង្វល់នៃការរីករាលដាលជាសកលមានកាន់តែខ្លាំងឡើង៕