[BREAKING NEWS] អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ អាចត្រូវបានដោះលែងឲ្យនៅក្រៅឃុំក្នុងពេលឆាប់ៗ គឺនៅចុងខែកុម្ភៈ ឆ្នាំ២០២៤ បន្ទាប់ពីរូបលោក ត្រូវបានកាត់ទោសដាក់ពន្ធនាគាររយៈពេល៨ឆ្នាំ ហើយដែលត្រូវបានកាត់បន្ថយមកត្រឹម១ឆ្នាំ បន្ទាប់ពីលោកវិលត្រឡប់ចូលប្រទេសវិញ ក្រោយពីបាននិរទេសខ្លួនទៅក្រៅប្រទេស ១៥ឆ្នាំមកនោះ។ នេះបើតាមមន្ត្រីជាន់ខ្ពស់មួយរូបពីមន្ទីរកែប្រែ ដែលបាននិយាយ នៅថ្ងៃចន្ទ (ទី១៨ ខែកញ្ញា) នេះ។

អ្នកនយោបាយដ៏លេចធ្លោជាងគេរបស់ប្រទេសថៃរូបនេះ បានវិលត្រឡប់មកកាន់មាតុប្រទេសដ៏គួរឲ្យភ្ញាក់ផ្អើល កាលពីខែមុន ពោលគឺរយៈពេល ១៥ឆ្នាំ បន្ទាប់ពីរូបលោកបាននិរទេសខ្លួន ក្រោយមានរដ្ឋប្រហារយោធា ក្នុងឆ្នាំ២០០៦។ ខណៈពេលដែលនៅក្រៅប្រទេស លោក ថាក់ស៊ីន ត្រូវបានគេរកឃើញថា មានពិរុទ្ធភាព សម្រាប់ការកាត់ក្ដីកំបាំងមុខ ក្នុងសំណុំរឿងចំនួន៣ ដែលពាក់ព័ន្ធនឹងការរំលោភបំពានអំណាច ជម្លោះផលប្រយោជន៍ និងការប្រព្រឹត្តិខុសច្បាប់។

អ្វីដែលគួរឲ្យចាប់អារម្មណ៍នោះ គឺថា ការវិលត្រឡប់របស់លោកទៅកាន់ប្រទេសថៃវិញ កើតមានឡើងស្របពេលដែលសម្ព័ន្ធមិត្តរបស់លោក គឺលោក សេដ្ឋា ថាវីស៊ីន (Srettha Thavisin) ក្លាយជានាយករដ្ឋមន្ត្រីថ្មីរបស់ប្រទេស បន្ទាប់ពីប្រទេសនេះមានភាពមិនច្បាស់លាស់ផ្នែកនយោបាយជាច្រើនខែ ក្រោយការបោះឆ្នោត កាលពីខែឧសភា ដែលឃើញថា គណបក្សគាំទ្រយោធាដែលកាន់អំណាច បានរងបរាជ័យ។

សូមរំលឹកថា សម្រាប់យប់ដំបូងរបស់លោក នៅក្នុងប្រទេសថៃ លោក ថាក់ស៊ីន ត្រូវបានបញ្ជូនទៅកាន់មន្ទីរពេទ្យនគរបាល ដោយសារមានអាការឈឺទ្រូង និងបញ្ហាលើសឈាម ដែលបច្ចុប្បន្នកំពុងព្យាបាល។ ប៉ុន្មានថ្ងៃក្រោយមក ព្រះមហាក្សត្រ Maha Vajiralongkorn ទ្រង់បានព្រះរាជទានកាត់បន្ថយរយៈពេលនៃការជាប់ទោសពី ៨ឆ្នាំ មកត្រឹម ១ឆ្នាំ ប៉ុន្តែរូបលោកអាចនឹងត្រូវបានដោះលែងឆាប់ជាងនោះ។

អគ្គនាយករងនៃនាយកដ្ឋានកែប្រែ លោក សិទ្ធី សុទីវង្ស (Sitthi Sutivong) បានប្រាប់សារព័ត៌មាន Reuters ថា៖ «បន្ទាប់ពីជាប់ទោសរយៈពេល ៦ខែ លោក ថាក់ស៊ីន នឹងមានសិទ្ធិទទួលបានការដោះលែង សម្រាប់អ្នកទោសដែលមានអាយុលើសពី ៧០ឆ្នាំឡើងទៅ ឬអ្នកទោសដែលមានជម្ងឺ»៕