រដ្ឋមន្ត្រីក្រសួងកសិកម្មរបស់ប្រទេសអេស្ប៉ាញបាននិយាយថា ការហាមឃាត់ជាឯកតោភាគី ដែលត្រូវបានអនុវត្ត ចំពោះការនាំចូលគ្រាប់ធញ្ញជាតិរបស់អ៊ុយក្រែន ពីសំណាក់ប្រទេសហុងគ្រី ស្លូវ៉ាគី និងប៉ូឡូញ កាលពីចុងសប្តាហ៍ គឺជាការ «ដើរផ្ទុយ» នឹងការរួបរួមរបស់សហភាពអឺរ៉ុប ហើយអាចជាការសម្រេចខុសច្បាប់។

គណៈកម្មការអឺរ៉ុបបានលុបចោលនូវការហាមឃាត់លើការនាំចូលគ្រាប់ធញ្ញជាតិអ៊ុយក្រែនចំនួន៤ កាលពីថ្ងៃសុក្រចុងសប្ដាហ៍កន្លងមក ដោយផ្អែកលើលក្ខខណ្ឌ ដែលទីក្រុងគីវ បានយល់ព្រម ក្នុងការការពារកុំឲ្យមានការកើនឡើងនូវគ្រាប់ធញ្ញជាតិចូលទៅក្នុងប្រទេសជិតខាងអឺរ៉ុប។ តែប្រទេសប៉ូឡូញ ស្លូវ៉ាគី និងហុងគ្រី បន្ទាប់មក បានសម្រេចអនុវត្តការទប់ស្កាត់ដោយផ្ទាល់ខ្លួនរបស់ពួកគេ។

លោក Luis Planas បាននិយាយមុនពេលធ្វើជាប្រធានកិច្ចប្រជុំរដ្ឋមន្ត្រីកសិកម្ម នៅថ្ងៃចន្ទនេះថា៖ «សម្រាប់ខ្ញុំ ការចាត់វិធានការជាឯកតោភាគីលើហាមឃាត់នូវការចូលទៅកាន់ទីផ្សារតែមួយ ហាក់ដូចជានៅក្រៅច្បាប់ ប៉ុន្តែវាអាស្រ័យលើការវិនិច្ឆ័យរបស់គណៈកម្មាធិការ»។

សូមបញ្ជាក់ថា សហភាពអឺរ៉ុបបានអនុវត្តបម្រាមបណ្តោះអាសន្ននេះ កាលពីខែឧសភា បន្ទាប់ពីប្រទេសទាំង៥ បានត្អូញត្អែរថា ការនាំចូលដ៏ច្រើនលើសលប់ កំពុងធ្វើឲ្យធ្លាក់ចុះនូវតម្លៃកសិផលរបស់កសិករ ក្នុងប្រទេស៕