គណៈកម្មាធិការកាកបាទក្រហមអន្ដរជាតិឬ (ICRC) បាននិយាយនៅថ្ងៃច័ន្ទនេះថា ខ្លួនបានបញ្ជូនក្បួនរថយន្តដឹកជញ្ជូនជំនួយមនុស្សធម៌ទៅតំបន់ផ្ដាច់ខ្លួន ការ៉ាបាក់ (Karabakh) ដែលចេញពីប្រទេសអាមេនី និង អាស៊ៃបៃហ្សង់ព្រមៗគ្នា ដោយមានការបើកផ្លូវឡើងវិញដែលតភ្ជាប់ទៅប្រទេសអាមេនី ដែលបានបិទតាំងពីខែធ្នូឆ្នាំកន្លងទៅ។
តំបន់ការ៉ាបាក់ត្រូវបាទទួលស្គាល់ជាអន្ដរជាតិថាជាផ្នែកមួយរបស់ប្រទេសអាស៊ែរបៃហ្សង់ ប៉ុន្ដែមានប្រជាជន អាមេនីរស់នៅច្រើនលើសលប់ ដែលទទួលឯករាជ្យភាពតាមជាក់ស្តែងចេញពីក្រុងបាគូនៅដើមឆ្នាំ១៩៩០បន្ទាប់ពីមានសង្រ្គាមដ៏អូសបន្លាយយូរមក។
ប្រទេសអាស៊ែរបៃហ្សង់ បានបិទតំបន់ការ៉ាបាក់ ទាំងស្រុងចាប់តាំងពីខែធ្នូឆ្នាំ២០២២មក ដោយបង្កឲ្យមានភាពអត់ឃ្លានយ៉ាងខ្លាំងនៅក្នុងតំបន់នេះ។
ប្រទេសអាស៊ែរបៃហ្សង់ និងរដ្ឋបាលផ្ដាច់ខ្លួនការ៉ាបាក់ បានព្រមព្រៀងគ្នានូវការបើកផ្លូវពីព្រមៗគ្នាឡើងវិញនៅដើមខែនេះ ជាមួយនឹងរថយន្ដដឹកជំនួយតែមួយរបស់រុស្ស៊ី ចូលទៅក្នុងតំបន់ការ៉ាបាក់ដោយចេញពី ប្រទេសអាស៊ែរបៃហ្សង់ នៅក្នុងការស្ដារឡើងវិញជាដំបូងនូវបណ្តាញដឹកជញ្ជូនដោយផ្ទាល់ចាប់តាំងពីឆ្នាំ១៩៨៨មក។