ប៊ុលហ្ការី ៖ ក្រុមកសិករប៊ុលហ្គារី បាននាំយកត្រាក់ទ័ររបស់ពួកគេ ដើម្បីធ្វើការតវ៉ាកាលពីថ្ងៃច័ន្ទ (១៨ កញ្ញា) បន្ទាប់ពីសភារបស់ប្រទេសនេះ បានបោះឆ្នោតលុបចោលការហាមឃាត់ការនាំចូលផលិតផលមួយចំនួនរបស់អ៊ុយក្រែន។ 

សេចក្ដីសម្រេចដែលបានអនុម័តដោយសភាប៊ុលហ្គារីបាននិយាយថា ការហាមឃាត់នេះត្រូវបានបញ្ចប់ដោយគិតគូរពី «សាមគ្គីភាពជាមួយអ៊ុយក្រែន» របស់ប្រទេសនេះ ហើយការប្រកួតប្រជែងរបស់អ្នកផលិតកសិកម្មប៊ុលហ្គារី នឹងមិនរងផលប៉ះពាល់នោះទេ។

ការដាក់កំហិតដោយសហភាពអឺរ៉ុបកាលពីខែឧសភា បានអនុញ្ញាតឱ្យប្រទេសប៉ូឡូញ ប៊ុលហ្គារី ហុងគ្រី រូម៉ានី និងស្លូវ៉ាគី ហាមឃាត់ការលក់ស្រូវសាលី ពោត គ្រាប់សណ្ដែក និងគ្រាប់ផ្កាឈូករ័ត្នរបស់អ៊ុយក្រែននៅក្នុងស្រុក ប៉ុន្តែអនុញ្ញាតឱ្យមានការដឹកជញ្ជូនទំនិញបែបនេះសម្រាប់នាំចេញទៅកន្លែងផ្សេងទៀត។

ការរឹតបន្តឹង ដែលត្រូវបានដាក់ឡើងដើម្បីបន្ធូរបន្ថយការផ្គត់ផ្គង់លើសកម្រិតនោះ បានផុតកំណត់កាលពីថ្ងៃសុក្រ (១៥ កញ្ញា) ប៉ុន្តែប្រទេសប៉ូឡូញ ហុងគ្រី និងស្លូវ៉ាគី បានដាក់បម្រាមឯកតោភាគីផ្ទាល់ខ្លួនរបស់ពួកគេ ដែលរដ្ឋធានី គីវ បាននិយាយថា ខ្លួននឹងប្តឹងប្រទេសទាំងនោះ។ 

នាយករដ្ឋមន្ត្រីរ៉ូម៉ានីបាននិយាយកាលពីថ្ងៃចន្ទថា ប្រទេសរបស់លោកនឹងសម្លឹងមើលការបន្តបម្រាមពាណិជ្ជកម្មលើគ្រាប់ធញ្ញជាតិអ៊ុយក្រែនរយៈពេល៣០ថ្ងៃទៀត ប្រសិនបើសំណើនាំចូលកើនឡើង៕