អាមេរិក ៖ យោងតាមការរាយការណ៍របស់សារព័ត៌មាន AP បានឲ្យដឹងថា មហាសន្និបាតអង្គការសហប្រជាជាតិកំពុងបើកសម័យប្រជុំលើកទី៧៨ របស់ខ្លួននៅទីក្រុងញូវយ៉ក សហរដ្ឋអាមេរិកក្នុងសប្តាហ៍នេះ ដោយចាប់ផ្តើមពីថ្ងៃច័ន្ទ (១៨ កញ្ញា) ហើយថ្ងៃដំបូងនៃកិច្ចពិភាក្សាទូទៅ នឹងចាប់ផ្តើមនៅថ្ងៃអង្គារ (១៩ កញ្ញា)នេះ។ 

ដូចដែលបានរៀបរាប់ក្នុងការកោះប្រជុំ អង្គការសហប្រជាជាតិមិនមានប្រធានបទស្ដីពីវិបត្តិច្បាស់លាស់ណាមួយ ដែលត្រូវផ្តោតទៅលើនោះទេ ដោយសារតែវិបត្តិពិភពលោកកំពុងកើតឡើងជាច្រើន។

ការឈ្លានពានរបស់រុស្ស៊ីលើអ៊ុយក្រែន ត្រូវបានគេរំពឹងថា នឹងគ្របដណ្តប់លើកិច្ចពិភាក្សានៅឆ្នាំនេះម្តងទៀត ប៉ុន្តែក៏មានការព្រួយបារម្ភយ៉ាងខ្លាំងអំពីវិបត្តិនយោបាយថ្មីនៅក្នុងទ្វីបអាហ្រ្វិក រួមទាំងនីហ្សេ និងស៊ូដង់ អស្ថិរភាពសេដ្ឋកិច្ច បម្រែបម្រួលអាកាសធាតុ គ្រោះមហន្តរាយធម្មជាតិថ្មីៗ រួមទាំងការរញ្ជួយដីនៅប្រទេសម៉ារ៉ុក ទឹកជំនន់នៅកន្លែងជាច្រើនជុំវិញពិភពលោក ចំហេះព្រៃជាច្រើនករណី និងបញ្ហាវីរុសកូវីដ១៩ ដែលកំពុងបន្ត និងវិវត្តន៍ខ្លួនផងដែរ។

លោក Antonio Guterres អគ្គលេខាធិការអង្គការសហប្រជាជាតិ បាននិយាយនៅក្នុងសន្និសីទសារព័ត៌មានកាលពីសប្តាហ៍មុនថា «យើងនឹងជួបជុំគ្នា នៅខណៈពេលដែលមនុស្សជាតិប្រឈមមុខនឹងបញ្ហាប្រឈមដ៏ធំ ចាប់ពីភាពអាសន្ននៃអាកាសធាតុកាន់តែអាក្រក់ រហូតដល់ជម្លោះកាន់តែខ្លាំងឡើង វិបត្តិថ្លៃចំណាយក្នុងការរស់នៅសកល កំណើនវិសមភាព និងការរំខានផ្នែកបច្ចេកវិទ្យាយ៉ាងខ្លាំងផងដែរ»៕