ឥណ្ឌូណេស៊ី ៖ ប្រទេសឥណ្ឌូណេស៊ី បានចាប់ផ្តើមសមយុទ្ធយោធារួមគ្នាលើកដំបូងដោយប្លុកសមាគមប្រជាជាតិអាស៊ីអាគ្នេយ៍ (អាស៊ាន) នៅលើកោះ Batam នៅថ្ងៃអង្គារ (១៩ កញ្ញា) នេះ ស្របពេលមានកំណើនភាពតានតឹងដែនសមុទ្រជាមួយចិន នៅក្នុងតំបន់សមុទ្រចិនខាងត្បូង។

សមយុទ្ធសាមគ្គីភាពអាស៊ាន-០១ ណាទូណា (ASEX-01N) រយៈពេលប្រាំថ្ងៃ នឹងប្រព្រឹត្តទៅនៅកោះ ណាទូណា (Natuna) របស់ឥណ្ឌូនេស៊ី ក្បែរសមុទ្រចិនខាងត្បូង ដែលមានបុគ្គលិកយោធាមកពីប្រទេសសមាជិកអាស៊ានទាំងអស់ រួមទាំងទីម័រខាងកើតក៏នឹងចូលរួមផងដែរ។

មេទ័ពឥណ្ឌូណេស៊ី លោក Yudo Margono បានប្រាប់ក្រុមអ្នកសារព័ត៌មានក្នុងពិធីបើកសមយុទ្ធនេះថា សមយុទ្ធមិនប្រយុទ្ធនេះ គឺសំដៅលើកិច្ចសហប្រតិបត្តិការ និងការពង្រឹងភាពជាដៃគូយុទ្ធសាស្ត្រក្នុងចំណោមប្រទេសជាសមាជិក។

សមយុទ្ធនេះ កើតឡើងស្របពេលមានភាពតានតឹងកើនឡើងជាមួយប្រទេសចិន បន្ទាប់ពីទីក្រុងប៉េកាំងបានចេញផ្សាយផែនទីកាលពីខែសីហា ជាមួយនឹងខ្សែ «បន្ទាត់១០ចំណុច» ដែលបង្ហាញពីអ្វីដែលហាក់ដូចជាការពង្រីកតំបន់ ដែលខ្លួនចាត់ទុកថាជាទឹកដីរបស់ខ្លួននៅក្នុងសមុទ្រចិនខាងត្បូង ប៉ុន្តែសមាជិកអាស៊ានមួយចំនួនបានច្រានចោលផែនទីនេះ៕