អាមេរិក ៖ គេហទំព័រក្រសួងរតនាគារសហរដ្ឋអាមេរិក បានរាយការណ៍ថា កាលពីថ្ងៃចន្ទម្សិលមិញ សហរដ្ឋអាមេរិក បានដាក់ទណ្ឌកម្មអតីតប្រធានាធិបតីអ៊ីរ៉ង់លោក Mahmoud Ahmadinejad និងក្រសួងចារកម្មប្រទេសមួយនេះ ។ 

 ទណ្ឌកម្មនេះ ត្រូវបានចេញដោយបទបញ្ជាប្រតិបត្តិសហរដ្ឋអាមេរិក ពាក់ព័ន្ធនឹងការចាប់ចំណាប់ខ្មាំង ក្រោយប្រទេសទាំង ២ បានយល់ព្រមដោះដូរអ្នកទោស ។ វិធានការនេះដែរ បន្ថែមពីលើទណ្ឌកម្មមានស្រាប់របស់សហរដ្ឋអាមេរិក ដែលមានគោលដៅលើក្រសួងចារកម្មអ៊ីរ៉ង់ ។ 

 ពលរដ្ឋសហរដ្ឋអាមេរិក ៥នាក់ បានចាកចេញពីអ៊ីរ៉ង់ ហើយបានចុះចតនៅទីក្រុង Doha របស់ប្រទេសកាតា កាលពីថ្ងៃចន្ទ ដើម្បីជាការដោះដូរអ្នកទោសសម្រាប់ពលរដ្ឋអ៊ីរ៉ង់ ៥រូបដែលត្រូវបានឃាត់ខ្លួននៅសហរដ្ឋអាមេរិក ហើយនិងការផ្ទេរប្រាក់ ៦ពាន់លានដុល្លារចូលទៅក្នុងមូលនិធិអ៊ីរ៉ង់ នៅក្នុងពេលដ៏កម្រមួយនៃកិច្ចសហប្រតិបត្តិការរវាងប្រទេសសត្រូវដ៏យូរទាំង ២ ។ 

 ដោយឡែក ទូរទស្សន៍ Press TV របស់អ៊ីរ៉ង់ បានរាយការណ៍ថា ពលរដ្ឋអ៊ីរ៉ង់ ៥នាក់ ដែលត្រូវបានឃាត់ខ្លួនដោយសហរដ្ឋអាមេរិក និងរងការចោទប្រកាន់ពីបទប្រព្រឹត្តបទឧក្រិដ្ឋ ត្រូវបានគេដោះលែងឲ្យមានសេរីភាពវិញ ៕