នៅពេលដែលលោក Joe Biden ចូលកាន់តំណែង លោកបានសន្យាថា នឹងយកបញ្ហាសិទ្ធិមនុស្សជា ចំណុចសំខាន់»នៃគោលនយោបាយការបរទេសរបស់អាមេរិក។ ប៉ុន្តែប្រធានាធិបតីអាមេរិក ឥឡូវនេះកំពុងពេញចិត្តពេញថ្លើមជាមួយបណ្ដាប្រទេសមួយចំនួន ដូចជាវៀតណាម អារ៉ាប៊ីសាអ៊ូឌីត និងឥណ្ឌាជាដើម ដែលមានកំណត់ត្រាខុសៗគ្នា នៅពេលនិយាយដល់ការគោរពសិទ្ធិពលរដ្ឋរបស់ប្រទេសទាំងនេះ។ ការផ្លាស់ប្តូរគោលនយោបាយនេះ ទាមទារមានការពន្យល់ឲ្យបានសមស្របបន្តិច។

យ៉ាងណាក៏ដោយចុះ ក៏មូលហេតុចម្បងនៃការកែប្រែនេះ គឺមានសភាពច្បាស់លាស់ណាស់។ ការលុកលុយរបស់រុស្ស៊ីលើអ៊ុយក្រែន និងការកើនឡើងភាពតានតឹងជាមួយប្រទេសចិន ឥឡូវនេះ កំពុងជំរុញដល់គោលនយោបាយការបរទេសរបស់សហរដ្ឋអាមេរិក ហើយការគិតគូរពីក្រមសីលធម៌ បានក្លាយទៅជារឿងបន្ទាប់បន្សំរបស់ប្រទេសមហាអំណាចមួយនេះ។

តែក្នុងដំណើររបស់លោកទៅអាស៊ី ក្នុងខែនេះ លោក Biden បានបដិសេធចំពោះការលើកឡើងថា លោកបានបោះបង់ចោលបញ្ហាមនុស្សធម៌ សម្រាប់បញ្ហាយុទ្ធសាស្ត្រនានារបស់អាមេរិក ដោយនិយាយថា លោកបានលើកសំណួរអំពីសិទ្ធិមនុស្សជាមួយនាយករដ្ឋមន្ត្រីឥណ្ឌាលោក Narendra Modi និងមេដឹកនាំវៀតណាម។ ទោះយ៉ាងនេះក្ដី បណ្ដាក្រុមសិទ្ធិមនុស្សនានា ដូចជាអង្គការលើកលែងទោសអន្តរជាតិ (Amnesty International) និងអង្គការឃ្លាំមើលសិទ្ធិមនុស្ស (Human Rights Watch) នៅតែមានការព្រួយបារម្ភដដែល។

ការបត់បែននេះ ត្រូវបានបង្ហាញកាន់តែច្បាស់ នៅពេលដែលលោក Biden បានធ្វើដំណើរទៅទីក្រុងញូវដេលី ប្រទេសឥណ្ឌា កាលពីដើមខែនេះ ដើម្បីចូលរួមកិច្ចប្រជុំកំពូលនៃក្រុមប្រទេសសេដ្ឋកិច្ចឈានមុខគេទាំង២០ ឬ G20 ជាកន្លែង ដែលលោកបានសរសើរលោក Modi និងបានចាប់ដៃជាមួយរាជ្ជទាយាទរបស់អារ៉ាប៊ីសាអ៊ូឌីត ព្រះអង្គម្ចាស់ Mohammed bin Salman។ បន្ទាប់មក លោកប្រធានាធិបតីរូបនេះ បានធ្វើដំណើរទៅកាន់ទីក្រុងហាណូយ ជាកន្លែង ដែលវៀតណាមបានយល់ព្រមធ្វើឲ្យទំនាក់ទំនងរបស់ខ្លួនជាមួយសហរដ្ឋអាមេរិកឡើងដល់កម្រិតខ្ពស់បំផុត៕