​អង់គ្លេស៖ លោកនាយក​រដ្ឋមន្ត្រី​អង់គ្លេស Boris Johnson ​បាន​រៀប​អាពាហ៍ពិពាហ៍​ជា​មួយ​គូ​កំណាន់​របស់​លោក​ឈ្មោះ Carrie Symonds ​យ៉ាង​ស្ងាត់កំបាំង​តាម​ការ​គ្រោង​ទុក​នៅ​ព្រះវិហារ ​Westminster​។ អ្នកនាំពាក្យ​វិមាន​ម​នាយករដ្ឋមន្ត្រី Downing Street បាន​និយាយ​ថា អាពាហ៍ពិពាហ៍​នេះ​ធ្វើឡើង​ដោយ​មាន​ពិធី​តូចតាច​កាលពី​រសៀល​ថ្ងៃ​សៅរ៍​។​

​អ្នកនាំពាក្យ​ខាងលើ​បន្ថែម​ថា​ គូស្នេហ៍​មួយ​គូ​នេះ​នឹង​រៀបចំ​ពិធី​ម្ដងទៀត​ជាមួយ​ក្រុម​គ្រួសារ​ និង​មិត្ត​ភ័ក្ត្រ​នៅ​រដូវ​ក្ដៅ​ក្រោយ ហើយ​ការ​ក្រេប​ច័ន្ទ​ទឹកឃ្មុំក៏​នឹង​ពន្យារពេល​ដែរ ​រហូត​ដល់ពេល​នោះ​ដែរ​។ ​លោក​គឺជា​នាយករដ្ឋមន្ត្រី​ដំបូង​ដែល​បាន​រៀប​អាពាហ៍ពិពាហ៍​ អំឡុង​ពេល​កាន់​តំណែង​នៅ​ក្នុង​ចំណោម​នាយក​រដ្ឋមន្ត្រី​ទាំងអស់​ ក្នុង​រយៈពេល​ជិត ​២០០​ឆ្នាំ​មកនេះ​។ កាលពី​ថ្ងៃ​សៅរ៍​ សារព័ត៌មាន The Mail បាន​រាយការណ៍​ថា មាន​ភ្ញៀវ​ ៣០​នាក់​ត្រូវ​បាន​អញ្ជើញ​ឲ្យ​ចូលរួម​នៅ​ក្នុង​ពិធី​ដែល​មាន​ការ​ជូន​ដំណឹង​ភ្លាមៗ ដោយ​ចំនួន​អ្នកចូលរួម​ត្រូវ​បាន​កំណត់​ក្រោម​វិធានការ​រឹតត្បិត ​ទប់ស្កាត់​ការ​ឆ្លង​រាលដាល​ជំងឺ Covid-19 នៅ​ចក្រភព​អង់គ្លេស​។

ទោះ​បីជា​លោក Johnson វ័យ​ ៥៦​ឆ្នាំ​រូប​នេះ​ធ្លាប់​បាន​រៀប​អាពាហ៍ពិពាហ៍​ចំនួន ​២​ដង​រួច​មក​ហើយ​ក៏ដោយ​ក៏​ព្រះវិហារការ​តូ​លិ​ក Roman អាច​អនុញ្ញាត​ឲ្យ​រៀប​អាពាហ៍ពិពាហ៍​ជា​ថ្មី​ទៀត​បាន​ដែរ ប្រសិន​ប្រើ​ការ​រៀប​អាពាហ៍ពិពាហ៍​កន្លង​ទៅ​ធ្វើ​នៅ​ក្រៅ​ព្រះវិហារ​នេះ​។ លោក Johnson មាន​វ័យ ៥៦ឆ្នាំ ​និងកញ្ញា Symonds មាន​វ័យ ៣៣ឆ្នាំ​ដែល​ជា​អ្នកតស៊ូ​មតិ​ផ្នែក​បរិស្ថាន ​បាន​ប្រកាស​ពិធី​ភ្ជាប់​ពាក្យ​របស់​ពួកគេ​កាលពី​ខែ​កុម្ភៈ ​ឆ្នាំ​២០២០ និង​មាន​កូន​ប្រុស​ជាមួយគ្នា​ម្នាក់​ឈ្មោះ​ Wilfred អាយុ ១​ឆ្នាំ​។​ អាពាហ៍ពិពាហ៍​នេះ​គឺជា​លើកដំបូង​របស់​នាង Symonds និង​លើក​ទី​៣ ​របស់​លោក Johnson។ លោក​មាន​កូន​ ៥​នាក់​ផ្សេងទៀត​ជាមួយ​អតីត​ភរិយា​ផ្សេងគ្នា​៕

អត្ថបទ៖ សុខមាន