កាលពីថ្ងៃចន្ទម្សិលមិញ លោក Ovidio Guzman ដែលស្ថិតនៅក្នុងចំណោមកូនប្រុសរបស់មេខ្លោងគ្រឿងញៀនម៉ិកស៊ិក Joaquin El Chapo Guzman បានផ្តល់ចម្លើយពិភាពគ្មានទោសចំពោះការចោទប្រកាន់ពីបទជួយដូរសារធាតុហ្វេនតានីល នៅតុលាការសហព័ន្ធសហរដ្ឋអាមេរិក ស្ថិតក្នុងទីក្រុង Chicago ។ នេះបើយោងតាមការអះអាងឲ្យដឹងពីសាលាកាត់ក្តី Chicago បានឲ្យដឹង រយៈពេល ៣ថ្ងៃក្រោយការធ្វើបត្យាប័នពីប្រទេសម៉ិកស៊ិក ។

លោក Guzman វ័យ ៣៣ឆ្នាំ គឺជាកូនម្នាក់នៅក្នុងចំណោមកូនប្រុស ៤នាក់របស់លោក El Chapo គេស្គាល់ឈ្មោះ Los Chapitos ដែលបានស្នងកេរតំណែលអាណាចក្ររត់ពន្ធគ្រឿងញៀនពីឪពុករបស់ពួកគេ ក្រោយការកាត់ទោសរបស់គាត់ពីបទឃាតម្ម និងបទចោទប្រកាន់គ្រឿងញៀនសហរដ្ឋអាមេរិក កាលពីឆ្នាំ ២០១៩ ។ លោក El Chapo Guzman កំពុងជាប់ទោសអស់មួយជីវិតនៅក្នុងពន្ធនាគារមានសន្តិសុខរឹងមាំខ្លាំង ស្ថិតនៅរដ្ឋ Colorado ។

សាលាកាត់ក្តី រាយការណ៍ថា អំឡុងសវនាការមួយភ្លែតក្រោមសន្តិសុខដ៏តឹងរឹង លោក Guzman ពាក់អាវអ្នកទោសពណ៌លឿងទុំ ដោយក.ជើងរបស់គាត់ដាក់ច្រវ៉ាក់ ស្តាប់ពាក្យបណ្តឹងតាមរយៈអ្នកបកប្រែភាសាអេស្ប៉ាញ។ 

យោងតាមការអះអាងរបស់សាលាក្តីបានឲ្យដឹងថា ក្រុមរដ្ឋអាជ្ញាធរ បាននិយាយថា ទោសព្រហ្មទណ្ឌ ២ករណី ក្នុងចំណោម ៦ករណីដែលលោក Guzmanប្រឈម នឹងកាត់ទោសឲ្យជាប់ពន្ធនាគារអស់មួយជីវិត ។

សារព័ត៌មានបានរាយការណ៍ថា សហរដ្ឋអាមេរិក សន្យាមិនបន្តការកាត់ទោសប្រហារជីវិតនោះទេ ដែលជាផ្នែកមួយនៃការកិច្ចចរចាធ្វើបត្យាប័នជាមួយប្រទេសម៉ិកស៊ិក ។ ការឡើងតុលាការបន្ទាប់របស់គាត់ ត្រូវបានកំណត់ធ្វើឡើងនៅខែវិច្ឆិកាខាងមុខ ៕