អ្នកជំនាញរបស់អង្គការសហប្រជាជាតិនិយាយថា ស្ថានភាពសិទ្ធិមនុស្សនៅក្នុងប្រទេសរុស្ស៊ី គឺ«កាន់តែអាក្រក់ខ្លាំងឡើងៗហើយ» ចាប់តាំងពីប្រទេសនេះបានលុកលុយអ៊ុយក្រែន កាលពីខែកុម្ភៈឆ្នាំមុន។

អ្នករាយការណ៍ពិសេសរបស់អង្គការសហប្រជាជាតិ លោកស្រី Mariana Katzarova បានចេញរបាយការណ៍មួយ កាលពីថ្ងៃចន្ទ (ទី១៨ ខែកញ្ញា) បន្ទាប់ពីលោកស្រីបានស៊ើបអង្កេតសិទ្ធិមនុស្សនៅក្នុងប្រទេសរុស្ស៊ី។

របាយការណ៍បានកត់សម្គាល់ថា រដ្ឋបាលរបស់ប្រធានាធិបតីលោក វ្ល៉ាឌីមៀរ ពូទីន បានកែប្រែច្បាប់ព្រហ្មទណ្ឌ កាលពីខែមីនាឆ្នាំមុន ដើម្បីធ្វើអំពើឧក្រិដ្ឋកម្ម ក្នុងការផ្សព្វផ្សាយព័ត៌មានមិនពិត អំពីប្រតិបត្តិការយោធារបស់រុស្ស៊ី។ របាយការណ៍នោះឲ្យដឹងថា មនុស្សយ៉ាងហោចណាស់ ១៨៥នាក់ ត្រូវបានចោទប្រកាន់ក្រោមច្បាប់ដែលបានកែសម្រួលនេះ។

របាយការណ៍ក៏លើកឡើងផងដែរថា មនុស្សជាង ២០.០០០នាក់ ដែលបានចូលរួមក្នុងការតវ៉ាប្រឆាំងនឹងការលុកលុយរបស់រុស្ស៊ីត្រូវបានចាប់ឃុំខ្លួន ខណៈដែលអាជ្ញាធរបានរឹតបន្តឹងការបង្ក្រាបលើសង្គមស៊ីវិល។ ជាមួយគ្នានេះ មានសេចក្ដីរាយការណ៍ថា ប្រព័ន្ធផ្សព្វផ្សាយជាង ៣០០ស្ថាប័ន ត្រូវបានអាជ្ញាធរបង្ខំឲ្យផ្អាកសកម្មភាព។

របាយការណ៍នេះ បន្ថែមទៀតថា សិទ្ធិសេរីភាពក្នុងការជួបជុំ និងសេរីភាពនៃការបញ្ចេញមតិត្រូវបានរឹតត្បិតយ៉ាងខ្លាំងនៅរុស្ស៊ី។ នេះជារបាយការណ៍ដំបូង គិតចាប់តាំងពីក្រុមប្រឹក្សាសិទ្ធិមនុស្សអង្គការសហប្រជាជាតិ បានតែងតាំងលោកស្រី Katzarova ជាអ្នករាយការណ៍ពិសេស កាលពីឆ្នាំមុន៕