​អ៊ីស្រាអែល៖ ​អតីត​សម្ព័ន្ធមិត្ត​របស់​លោក​នាយក​រដ្ឋមន្ត្រី Benjamin Netanyahu បាន​និយាយ​កាលពី​ថ្ងៃអាទិត្យ​ថា លោក​នឹង​ព្យាយាម​បង្កើត​រដ្ឋាភិបាលចម្រុះ​ ជាមួយ​ក្រុម​គណបក្ស​គូប្រជែង​របស់​មេដឹកនាំ​អ៊ីស្រាអែល​រូប​នេះ ដែល​ជា​ការ​បោះ​ជំហាន​ដ៏​សំខាន់​ឆ្ពោះ​ទៅ​ការ​បញ្ចប់ ​របប​ដឹកនាំ​ជា​យក​រដ្ឋមន្ត្រី​របស់​លោក​។​

​សេចក្ដីប្រកាស​ដ៏​រំជើបរំជួល​ធ្វើឡើង​ដោយ​លោក Naftali Bennett មេដឹកនាំ​បក្ស​ប្រឆាំង​តូច​ប្រកាន់​តឹង យ៉ា​មីណា (Yamina) បាន​កំណត់​គោលដៅ​សម្រាប់​ជំហាន​បន្តបន្ទាប់ ដែល​អាច​រុញ​ដោល​ឲ្យ​លោក ​Netanyahu ​និង​គណបក្ស​ចម្រុះ​លី​កូដ​របស់​លោក​ត្រូវ​វាយ​តបត​នៅ​សប្ដាហ៍​នេះ។​ ស្រប​ពេល​ដែល លោក Bennett និង​ដៃគូ​ថ្មី​របស់​ខ្លួន​ដែល​ដឹកនាំ​ដោយ​មេដឹកនាំ​បក្ស​ប្រឆាំង​គឺ​លោក​ Yair Lapid នៅតែ​ប្រឈម​នឹង​ឧបសគ្គ​មួយ​ចំនួន ភាគី​ទាំងពីរ​ហាក់​ដូច​ជា​មាន​ភាព​ម៉ឺងម៉ាត់​ក្នុង​ការ​ឈាន​ដល់​កិច្ចព្រមព្រៀង​មួយ​ និង​ការ​បញ្ចប់​ភាព​ជាប់​គាំង ​ដែល​បាន​ធ្វើ​ឱ្យ​ប្រទេស​នេះ​ធ្លាក់​ចូល​ក្នុង​ការ​បោះ​ឆ្នោត​ចំនួន​ ៤​លើក​ក្នុង​រយៈពេល​ ២​ឆ្នាំ​កន្លង​មក​នេះ​។​

​នាយករដ្ឋមន្ត្រី​អ៊ីស្រាអែល ​លោក Benjamin Netanyahu កាលពី​ថ្ងៃអាទិត្យ​បាន​ប្រតិកម្ម​ ទៅ​នឹង​ការ​ប្រកាស​របស់​គណបក្ស​ប្រកាន់​តឹង​តូច​មួយ​ដែល​ថា​ ពួកគេ​នឹង​ព្យាយាម​បង្កើត​រដ្ឋាភិបាល​បង្រួប​បង្រួម​មួយ​ជាមួយ​គូប្រជែង​របស់​លោក ​ដោយ​ចាត់វិធានការ​សំខាន់​ឆ្ពោះ​ទៅ​រក​ការ​បញ្ចប់​ការ​គ្រប់​គ្រង​រយៈពេល ១២​ឆ្នាំ​របស់​មេដឹកនាំ​អ៊ីស្រាអែល​រូប​នេះ​។​ នៅ​ក្នុង​សេចក្ដីថ្លែងការណ៍​តាម​ទូរទស្សន៍​មួយ​ លោក Netanyahu បាន​ទទូច​ដល់​ក្រុម​អ្នកនយោបាយ​ជាតិនិយម ​ដែល​បាន​ចូលរួម​ក្នុង​កិច្ចចរចា​ចម្រុះ​នេះ​ កុំ​បង្កើត​អ្វី​ដែល​លោក​ហៅថា ​រដ្ឋាភិបាល​ឆ្វេង​និយម​៕

អត្ថបទ៖ សុខមាន