អ្នកគោរពសាសនាដ៏ស្មោះស្ម័គ្ររាប់លាននាក់បានចូលរួមក្នុងការដើរដង្ហែក្បួន និងប្រមូលផ្តុំគ្នានៅតាមវិហារនានា ក្នុងប្រទេសឥណ្ឌា នៅថ្ងៃអង្គារ (ទី១៩ ខែកញ្ញា)នេះ ដើម្បីប្រារព្ធពិធីបុណ្យរំលឹកខួបកំណើតរបស់ទេវៈដំរី «ព្រះគណេស» ក្នុងសាសនាហិណ្ឌូ។

គ្រប់ទីក្រុង ដែលប្រារព្ធពិធីរំលឹកខួបនេះ ធ្វើពិធីសាសនា និងពិធីបុណ្យតាមប្រពៃណីពិសេសរៀងៗខ្លួន។ អ្នកគោរពសាសនាមួយក្រុមមានរូបទេវបដិមាមួយអង្គ ដែលធ្វើពីមាស និងប្រាក់នៅទីក្រុង Mumbai ហើយរូបទេវបដិមាមួយ ក្នុងចំណោមទេវបដិមាជាច្រើន នៅភាគខាងត្បូងទីក្រុង Chennai ត្រូវបានឆ្លាក់ឡើងពីស្លឹកឧទុម្ពរ (ដើមល្វា) ដ៏ពិសិដ្ឋ។

ពិធីបុណ្យ «Ganesh Chaturthi» ឬ «Vinayaka Chaturthi» ត្រូវបានប្រារព្ធឡើងដើម្បីគោរពដល់ព្រះគណេស ដែលត្រូវបានចាត់ទុកថា ជាទេវៈនៃភាពរុងរឿងរបស់អ្នកកាន់សាសនហិណ្ឌូ។ ពិធីបុណ្យនេះត្រូវបានប្រារព្ធដោយភាកច្រើននៅភាគខាងលិច និងភាគខាងត្បូងនៃប្រទេស។ ពិធីបុណ្យនេះ គឺប្រារព្ធរយៈពេល ១០ថ្ងៃ បន្ទាប់មក ទេវបដិមានឹងត្រូវបានយកទៅពន្លិចក្នុងទឹក៕