ប្រទេសអ៊ុយក្រែនបានប្រាប់តុលាការជាន់ខ្ពស់របស់អង្គការសហប្រជាជាតិ នៅទីក្រុងឡាអេ ប្រទេសហូឡង់ នៅថ្ងៃអង្គារ (ទី១៩ ខែកញ្ញា) នេះ ថា ការផ្ដល់ហេតុផលរបស់រុស្ស៊ី ក្នុងការធ្វើសង្រ្គាមប្រឆាំងនឹងអ៊ុយក្រែន គឺជា «ការនិយាយកុហកដ៏គួរឲ្យខ្ពើមរអើមបំផុត» ដោយប្រឌិតរឿងថា ការលុកលុយរបស់ទីក្រុងម៉ូស្គូនោះ ត្រូវបានធ្វើឡើង គឺដើម្បីបញ្ចប់អំពើប្រល័យពូជសាសន៍ ដែលខ្លួនបានចោទប្រកាន់។

តំណាងរបស់អ៊ុយក្រែន លោក Anton Korynevych បានប្រាប់ចៅក្រមថា៖ «សហគមន៍អន្តរជាតិបានអនុម័តអនុសញ្ញាប្រល័យពូជសាសន៍ ដើម្បីការពារ តែប្រទេសរុស្ស៊ីបានបង្កើតអនុសញ្ញាប្រល័យពូជសាសន៍ ដើម្បីបំផ្លិចបំផ្លាញ»។

លោក Korynevych បានអំពាវនាវឲ្យតុលាការយុត្តិធម៌អន្តរជាតិ (ICJ) សម្រេចថា ខ្លួនមានយុត្តាធិការក្នុងការបើកសវនាការលើសំណុំរឿងនេះយ៉ាងពេញលេញ ហើយជាចុងក្រោយសម្រេចថា រុស្ស៊ីត្រូវតែសងសំណង សម្រាប់ការឈ្លានពានក្រោមពាក្យសម្ដីប្រឌិតឡើងរបស់ខ្លួន។

សូមរំលឹកថា កាលពីថ្ងៃចន្ទ (ទី១៨ ខែកញ្ញា) ប្រទេសរុស្ស៊ីបានជំរុញឲ្យតុលាការ ICJ ដែលត្រូវបានគេស្គាល់ថា ជាតុលាការពិភពលោកនោះទម្លាក់ចោលសំណុំរឿងនេះ ដោយអះអាងថា ទឡ្ហីករណ៍ផ្លូវច្បាប់របស់ទីក្រុងគីវ មាន «កង្វះចន្លោះច្រើន»។

សូមបញ្ជាក់ថា អ៊ុយក្រែនបាននាំយកសំណុំរឿងនេះ ទៅកាន់តុលាការ ICJ មួយថ្ងៃបន្ទាប់ពីការលុកលុយរបស់រុស្ស៊ី កាលពីថ្ងៃទី២៤ ខែកុម្ភៈឆ្នាំមុន។ ទីក្រុងគីវ អះអាងថា រុស្ស៊ីកំពុងបំពានច្បាប់អន្តរជាតិ ដោយនិយាយការពារថា ការលុកលុយនេះ គឺរឿងត្រឹមត្រូវ ព្រោះធ្វើឡើងដើម្បីបញ្ឈប់អំពើប្រល័យពូជសាសន៍ ដែលគេចោទប្រកាន់ថា កើតមាននៅភាគខាងកើតអ៊ុយក្រែន៕