ទីភ្នាក់ងារអង្គការសហប្រជាជាតិ (UN) បាននិយាយនៅថ្ងៃអង្គារ (ទី១៩ ខែកញ្ញា) នេះ ថា កុមារជាង ១.២០០នាក់ បានស្លាប់ដោយសារសង្ស័យថា មានជំងឺកញ្ជ្រឹល និងកង្វះអាហារូបត្ថម្ភ នៅក្នុងជំរុំជនភៀសខ្លួនរបស់ប្រទេសស៊ូដង់ ខណៈដែលមនុស្សជាច្រើនពាន់នាក់ទៀត រួមទាំងទារកទើបនឹងកើតផង ប្រឈមនឹងហានិភ័យនៃការស្លាប់មុនដំណាច់ឆ្នាំ។

ទីភ្នាក់ងារនោះបាននិយាយថា ជិត ៦ខែ នៅក្នុងជម្លោះ រវាងកងទ័ពរបស់ស៊ូដង់ និងក្រុមប៉ារ៉ាយោធា ដែលជាកងកម្លាំងគាំទ្ររហ័ស វិស័យថែទាំសុខភាពរបស់ប្រទេសនេះ កំពុងតែខិតកាន់តែជិតនឹងការដួលរលំហើយ ដោយសារតែការវាយប្រហារដោយផ្ទាល់ពីភាគីសង្រ្គាម ក៏ដូចជាការខ្វះខាតបុគ្គលិក និងថ្នាំពេទ្យ។

លោកវេជ្ជបណ្ឌិត Allen Maina ប្រធានផ្នែកសុខភាពសាធារណៈនៅទីភ្នាក់ងារជនភៀសខ្លួនរបស់អង្គការសហប្រជាជាតិ (UNHCR) បានប្រាប់សន្និសីទព័ត៌មានខ្លីៗរបស់អង្គការសហប្រជាជាតិ នៅទីក្រុងហ្សឺណែវ ប្រទេសស្វីសថា កុមារជាង ១.២០០នាក់ ដែលមានអាយុក្រោម ៥ឆ្នាំ បានស្លាប់នៅក្នុងរដ្ឋ White Nile ចាប់តាំងពីខែឧសភាមក។ លោកបានបន្ថែមថា៖ «ជាអកុសល យើងបារម្ភថា ចំនួននេះនឹងបន្តកើនឡើងទៀត»។

ដូចគ្នាដែរ អ្នកនាំពាក្យរបស់អង្គការយូនីសេហ្វ លោក James Elder បានប្រាប់សន្និសីទសារព័ត៌មាននេះថា «ទារកទើបនឹងកើតជាច្រើនពាន់នាក់» ក្នុងចំណោមទារកចំនួន ៣៣៣.០០០នាក់ ដែលគេដឹងថា គ្រោងនឹងសម្រាលនៅមុនដំណាច់ឆ្នាំនេះ នឹងស្លាប់៕