ភ្នំពេញ ៖ នៅថ្ងៃទី ១៩ ខែកញ្ញា ឆ្នាំ២០២៣ ដែលជជាថ្ងៃទី៣ នៃវេទិកាយុវជនលើកទី២ នៃសមាគមជាតិកាកបាទក្រហម និងអឌ្ឍចន្ទក្រហម ភូមិភាគអាស៊ីអាគ្នេយ៍ អង្គវេទិកាយុវជនបានពិភាក្សាជាក្រុមឱ្យកាន់តែស៊ីជម្រៅបន្ថែមទៀត ទៅលើប្រធានបទចំនួន ៥ ដែលពួកគេបានរកឃើញនូវបញ្ហាអាទិភាព និងកង្វល់មួយចំនួនកាលពីថ្ងៃទី១៨ ខែកញ្ញា រួមមាន ៖ ការអភិវឌ្ឍយុវជន, ការគាំពារ យេនឌ័រ និងបរិយាបន្ន, ការប្រែប្រួលអាកាសធាតុ, ការគ្រប់គ្រងគ្រោះមហន្តរាយ, សុខភាពផ្លូវចិត្ត និងការគាំទ្រចិត្តសាស្ត្រសង្គម ដើម្បីស្វែងរកដំណោះស្រាយថ្មីក្នុងវិស័យមនុស្សធម៌ ដោយបង្កើតជាផ្ទាំងរូបភាពគំរូមួយស្ដីពីបញ្ហាប្រឈមដែលជាកង្វល់របស់ពួកគេ និងកំណត់អំពីដំណើរការ ឬរបៀបនៃការដោះស្រាយកង្វល់ទាំងនោះ។

បន្ទាប់ពីបានរកឃើញនូវបញ្ហាប្រឈម និងដំណោះស្រាយរួចហើយនោះ យុវជនម្នាក់នៃក្រុមនីមួយៗ ដែលមកពីសមាគមជាតិខុសៗគ្នា នឹងធ្វើជាតំណាងរបស់ក្រុមខ្លួន បាននាំយកនូវគោលគំនិតដែលពួកគាត់បានពិភាក្សារួមគ្នានោះទៅកសាងនូវសេចក្ដីថ្លែងការណ៍រួមរបស់វេទិកាយុវជនលើកទី២ ជាមួយនឹងគ្រូសម្របសម្រួល។  

គូសបញ្ជាក់ផងដែរថា ប្រតិភូយុវជនទាំងអស់បានរកនូវវិធីសាស្ត្រ និងគំនិតថ្មី ដើម្បីធ្វើការបង្ហាញក្ដីកង្វល់ និងដំណោះស្រាយថ្មីដែលនឹងទទួលបានភាពជោគជ័យ និងលទ្ធផលយូរអង្វែងរបស់ពួកគេ ហើយយុវជននឹងត្រៀមឡើងអាននូវសេចក្ដីថ្លែងការណ៍រួមរបស់វេទិកាយុវជនលើកទី២ ជូនចំពោះថ្នាក់ដឹកនាំទាំង ១១ សមាគមជាតិ នៅថ្ងៃទី១ នៃកិច្ចប្រជុំថ្នាក់ដឹកនាំលើកទី២០ នៃសមាគមជាតិកាកបាទក្រហម និងអឌ្ឍចន្ទក្រហម ភូមិភាគអាស៊ីអាគ្នេយ៍ ក្រោមអធិបតីភាពដ៏ខ្ពង់ខ្ពស់ ដឹកនាំកិច្ចប្រជុំ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។

នាចុងបញ្ចប់នៃថ្ងៃទី៣របស់វេទិកាយុវជន គ្រូសម្របសម្រួលបានវាយតម្លៃខ្ពស់ និងបានប្រគល់បណ្ណសរសើរជូនប្រតិភូយុវជនជាតិ-អន្តរជាតិ ចំពោះការចូលរួមវេទិកាយុវជនលើកទី២ នៃសមាគមជាតិកាកបាទក្រហម និងអឌ្ឍចន្ទក្រហម ភូមិភាគអាស៊ីអាគ្នេយ៍ ប្រកបដោយឆន្ទៈ និងមោទនភាពក្នុងការចែករំលែកចំណេះដឹង បទពិសោធន៍ ដោយរៀនសូត្រពីគ្នាទៅវិញទៅមក សាមគ្គីភាពអន្តរជាតិ និងដោយស្មារតីទទួលខុសត្រូវខ្ពស់ ក្នុងនាមជាយុវជននៃចលនាកាកបាទក្រហម និងអឌ្ឍចន្ទក្រហម។

សូមបញ្ជាក់ផងដែរថា ព្រឹកថ្ងៃទី២០ ខែកញ្ញា ឆ្នាំ២០២៣នេះ ដែលជាថ្ងៃចុងក្រោយនៃវេទិកាយុវជនលើកទី២ ប្រតិភូយុវជនទាំង​អស់នឹង ទៅចូលរួមកម្មវិធីដាំដើមឈើ ក្រោមអធិបតីភាពដ៏ខ្ពង់ខ្ពស់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលនឹងប្រព្រឹត្តទៅនៅមជ្ឈមណ្ឌលវប្បធម៌ព្រះពុទ្ធសាសនាកម្ពុជា ដែលស្ថិតនៅក្នុងឧទ្យានជាតិព្រះសុរាម្រិត-កុសុមៈគិរីរម្យ ខេត្តកំពង់ស្ពឺ ហើយនៅពេលរសៀលនាថ្ងៃដដែល យុវជនបន្តទៅទស្សនកិច្ចសិក្សានៅសារមន្ទីរប្រល័យពូជសាសន៍ទួលស្លែង៕ ដោយ ៖ សុជាតា