ប្រភពពីមន្ត្រីជាន់ខ្ពស់កាណាដាមួយរូប បាននិយាយកាលពីថ្ងៃអង្គារថា ប្រទេសកាណាដា បាន​ធ្វើ​ការ​យ៉ាង​យកចិត្តទុកដាក់ជាមួយសហរដ្ឋអាមេរិក លើរបាយការណ៍ចារកម្ម ដែលថា​ក្រុម​ទីភ្នាក់​ងារ​ឥណ្ឌាត្រូ​វបានជាប់ពាក់ព័ន្ធក្នុងករណីឃាតកម្មលើមេដឹកនាំសាសនាស៊ីគ (Sikh) នៅក្នុង​ខេត្ត​ប្រីធីស កូឡុំប៊ី (British Columbia) កាលពីដើមឆ្នាំនេះ ។

លោកនាយករដ្ឋមន្ត្រី ចាស្ទីន ទ្រូដូ (Justin Trudeau) បានប្រកាស​កាល​ពី​ថ្ងៃ​ចន្ទថា​ទីភ្នាក់ងារ​ចារ​កម្ម​ក្នុងប្រទេស បានកំពុង​ស្វែងរកដាក់​ការ​ចោទ​ប្រកាន់​គួរ​ឱ្យ​ទុក​ចិត្ត​បានលើ​ក្រុម​ទីភ្នាក់ងារ​របស់​ទីក្រុង New Delhi ពីបទបាញ់សម្លាប់សកម្មជនលោក ហាឌីប ស៊ីញ នីចា (Hardeep Singh Nijjar) វ័យ៤៥ឆ្នាំកាលពីខែមិថុនាឆ្នាំនេះ។ 

កាលពីថ្ងៃអង្គារ លោក Trudeau  បានប្រាប់ក្រុមអ្នកសារព័ត៌មាន ថាករណីនេះ មានផលវិបាក​យ៉ាង​ទូលំទូលាយនៅក្នុងច្បាប់អន្តរជាតិ ហើយបានជំរុញឱ្យរដ្ឋាភិបាលឥណ្ឌា​យកចិត្តទុកដាក់​លើ​បញ្ហា​នេះ និងជួយកាណាដា ស៊ើបអង្កេតរឿងនេះឱ្យបានពេញលេញ។

ប្រទេសឥណ្ឌា បានច្រានចោលការបញ្ជាក់របស់លោក Trudeau ថាជាការអះអាង​មិន​សម​ហេតុផល​ និង បាននិយាយថា ខ្លួនបានបណ្ដេញអ្នកការទូតកាណាដា មួយវិញជាការសងសឹក​បន្ទាប់​ពី​កាណាដា បានបណ្ដេញមន្ត្រីចារកម្មជាន់ខ្ពស់របស់ឥណ្ឌាកាលពីថ្ងៃចន្ទ ដើមសប្ដាហ៍នេះ ។

ជម្លោះថ្មីៗនេះ ទាញទម្លាក់ទំនាក់ទំនាក់ការទូតឲ្យកាន់តែយ៉ាប់យ៉ឺនថែមទៀត លើទំនាក់​ទំនាក់​ដែល​កំពុង​ប្រះស្រាំជាច្រើនឆ្នាំមកនេះ ខណៈដែលទីក្រុង New Delhi មិនសប្បាយចិត្ត​ជុំវិញ​សកម្មភាព​របស់​សកម្មជនរបស់ជនផ្ដាច់ខ្លួនកាន់សាសនាស៊ីគនៅក្នុងប្រទេសកាណាដា៕