មេបញ្ជាការកងពលតូចដឹកជញ្ជូន៩៩ ឧត្តមសេនីយ៍ទោ ហ៊ុល សំអុន នៅព្រឹកថ្ងៃទី២០ ខែកញ្ញា ឆ្នាំ​២០២៣នេះ បានដឹកនាំនាយទាហាន ពលទាហាន នៃកងពលទាំងអស់ជួបជុំគ្នាវាយជួង ទូងស្គរ ដើម្បីអបអរសាទរ ដែលគណៈកម្មាធិការបេតិកភណ្ឌពិភពលោក នៃអង្គការយូណេស្កូ ក្នុង​​សម័យប្រជុំលើកទី៤៥ ប្រព្រឹត្តទៅនៅទីក្រុងរីយ៉ាដ ប្រទេសអារ៉ាប៊ីសាអូឌីត បាន​សម្រេច​បញ្ចូល​«រមណីយដ្ឋានប្រាសាទកោះកេរ» ជាសម្បត្តិបេតិកភណ្ឌពិភពលោក។

 ក្រោយធ្វើការវាយជួង និងចាក់ភ្លេងសាវតារខ្មែរ ដើម្បីអបអរសាទរ «រមណីយដ្ឋាន​ប្រាសាទ​កោះកេរ​» ​ក្នុងបញ្ជីសម្បត្តិបេតិកភណ្ឌពិភពលោកនោះ ឧត្តមសេនីយ៍ទោ ហ៊ុល សំអុន បាន​ថ្លែង​ថា ក្នុងនាមមេបញ្ជាការកងពលមួយរូប លោកពិតជាស្បាយចិត្តយ៉ាងខ្លាំង បន្ទាប់​ពី​អង្គការ​យូណេស្កូ​បាន​ដាក់«រមណីយដ្ឋានកោះកេរ»ជាសម្បត្តិបេតិកភណ្ឌពិភពលោក។ លោក​ឧត្តម​សេនីយ៍​បាន​បន្តថា ការដាក់នេះគឺបានឆ្លុះបញ្ចាំងកាន់តែច្បាស់នូវអរិយធម៌ដ៏រុងរឿង ដែល​ធ្វើ​ឱ្យ​កម្ពុជា​ក្លាយ​ជា​តួអង្គកាន់តែលេចធ្លោ និងមានកេរ្តិ៍ឈ្មោះល្បីល្បាញនូវទូទាំងពិភពលោកថែមទៀត ពិសេស​នៅលើវេទិកាបេតិកភណ្ឌពិភពលោកនេះតែម្តង។

លោកឧត្តមសេនីយ៍ ក៏បានលើកឡើងផងដែរថា ក្នុងនាមថ្នាក់ដឹកនាំ នាយទាហាន ពលទាហាន នៃ​កងពល​តូចដឹកជញ្ជូនលេខ៩៩ទាំងអស់ សូម​សំដែង​ការ​កោត​សរសើរ​ដោយ​ស្មោះអ​ស់​ពី​ដួង​ចិត្ត​ ជូនចំពោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដែលទើបតែកាន់តំណែងបានមិនទាន់ដល់មួយខែផង បានសម្រេចកិច្ចការដ៏ធំជូនជាតិមាតុភូមិ ដោយ​បាន​ធ្វើឲ្យ «រមណីយដ្ឋានប្រាសាទកោះកេរ» ទៅក្នុងបញ្ជីបេតិកភណ្ឌពិភពលោក ដើម្បី​ជា​ផល​ប្រយោជន៍​ដ៏​ឧត្តុង្គឧត្តមរបស់មនុស្សជាតិទាំងមូលនោះ។

សូមបញ្ជាក់ថារហូតដល់សព្វថ្ងៃនេះកម្ពុជា បាន​ដាក់​បញ្ចូល​ជា​សម្បត្តិ​វប្បធម៌​ពិភពលោក​ដោយ​អង្គការ​យូណេស្កូនោះមានចំនួន៩ហើយ ដោយក្នុងនោះរួមមាន ប្រាសាទអង្គរវត្ត នៅឆ្នាំ១៩៩២ របាំក្បាច់បុរាណខ្មែរ (របាំព្រះរាជទ្រព្យ) នៅឆ្នាំ២០០៣ ប្រាសាទព្រះវិហារ នៅឆ្នាំ២០០៨ ប្រាសាទ​សំបូរព្រៃគុក ឆ្នាំ២០១៧ និងល្ខោនខោល ឆ្នាំ២០១៨ និង​ឆ្នាំ២០២៣នេះ គឺរមណីយដ្ឋានកោះកេរ​៕ អត្ថបទ បាន ចក់