UN៖របាយការណ៍ការិយាល័យមនុស្សធម៌របស់អង្គការសហប្រជាជាតិ បាននិយាយកាលពីថ្ងៃអង្គារ (១៩ កញ្ញា) ដោយសំអាងដល់របាយការណ៍ពីមន្ទីរពេទ្យថា ជនអន្តោប្រវេសន៍ប្រហែល៤០០នាក់ ត្រូវបានសម្លាប់នៅក្នុងទឹកជំនន់ ដែលបានវាយប្រហារភាគខាងកើតប្រទេសលីប៊ីកាលពីសប្តាហ៍មុន។ 

របាយការណ៍នេះបានដកស្រង់ពីទីភ្នាក់ងារសុខភាពរបស់អង្គការសហប្រជាជាតិ អង្គការសុខភាពពិភពលោក ដែលបាននិយាយថា រហូតមកដល់ពេលនេះ តួលេខអ្នកស្លាប់ចំនួន៤,០០០នាក់ ត្រូវបានរាយការណ៍នៅក្នុងប្រទេសលីប៊ីដោយមន្ទីរពេទ្យ រួមទាំងជនអន្តោប្រវេសន៍ចំនួន៤០០នាក់ផងដែរ។

ជនអន្តោប្រវេសន៍អាហ្វ្រិក និងមជ្ឈិមបូព៌ារាប់ពាន់នាក់ មានមូលដ្ឋានបណ្តោះអាសន្នក្នុងប្រទេសលីប៊ី ហើយមនុស្សជាច្រើនបានធ្វើដំណើរឆ្លងកាត់សមុទ្រ មេឌីទែរ៉ាណេ ដ៏គ្រោះថ្នាក់ជារៀងរាល់ឆ្នាំ ដើម្បីគេចចេញពីភាពក្រីក្រ និងជម្លោះ។ 

អង្គការអន្តរជាតិសម្រាប់ការធ្វើអន្តោប្រវេសន៍ ធ្លាប់បាននិយាយថា ជនអន្តោប្រវេសន៍ជាង១០០.០០០ នាក់ បានរស់នៅក្នុងតំបន់រងគ្រោះដោយទឹកជំនន់ រួមទាំងជាង៨.០០០នាក់រស់នៅក្នុងទីក្រុង Derna របស់លីប៊ី ហើយពួកគេភាគច្រើនមកពីប្រទេសឆាដ អេហ្ស៊ីប និងស៊ូដង់ ផងដែរ៕