ស្នងការទទួលបន្ទុកជំនួយជនភៀសខ្លួន បាននិយាយថា ជនអន្តោប្រវេសន៍មួយក្រុមបានប្រមូលផ្តុំគ្នាដើម្បីបង្ខំឲ្យដំណើរការរបស់ពួកគេចូលក្នុងស្ថានីយជនអន្តោប្រវេសន៍ម៉ិកស៊ិកនៅព្រំដែនជាមួយប្រទេសហ្គាតេម៉ាឡា ដែលបណ្តាលឲ្យមនុស្ស២នាក់រងរបួស។

ទីភ្នាក់ងារបាននិយាយនៅក្នុងសេចក្តីថ្លែងការណ៍ថា ឧបទ្ទវហេតុនេះបានកើតឡើងនៅអំឡុងម៉ោង៩ព្រឹក ម៉ោងក្នុងតំបន់ នៅពេលដែលក្រុមពលរដ្ឋហៃទី បានប្រញាប់ប្រញាល់ចូលជាមួយអ្នកផ្សេងទៀត ដែលកំពុងរង់ចាំក្នុងជួរនៅខាងក្រៅស្ថានីយ Comar នៅទីក្រុង Tapachula ភាគខាងត្បូង ក្នុងរដ្ឋ Chiapas ។

ពលរដ្ឋហៃទី២នាក់ ដែលរងរបួស ត្រូវបានបញ្ជូនទៅកាន់មន្ទីពេទ្យនៅក្បែរនោះ។

យោងតាមស្ថានីយ Comar បានឲ្យដឹងថា ជនអន្តោប្រវេសន៍ ជិត២.០០០នាក់ ត្រូវបានជួយដោយអាជ្ញាធរម៉ិកស៊ិក កាលពីថ្ងៃអង្គារ ភាគច្រើនមកពីប្រទេសហៃទី គុយបា និងប្រទេសហុងឌុយរ៉ាស់។

ចំនួនដូចគ្នានេះដែរនៃអ្នកដាក់ពាក្យស្នើសុំ ត្រូវបានគេរំពឹងថា នឹងត្រូវទទួលនៅថ្ងៃពុធនេះ។