មន្ត្រីជាន់ខ្ពស់ក្រសួងការពារជាតិអាមេរិកនិយាយថា ការរារាំងរបស់ប្រទេសចិន ទាំងនៅដែនសមុទ្រ និងដែនអាកាស ជុំវិញកោះតៃវ៉ាន់ អាចនឹងមិនទទួលបានជោគជ័យទេ។

លោក Ely Ratner ដែលមានតួនាទីជាអនុរដ្ឋមន្ត្រីការពារជាតិអាមេរិកទទួលបន្ទុកកិច្ចការសន្តិសុខឥណ្ឌូ-ប៉ាស៊ីហ្វិក បានផ្តល់សក្ខីកម្មនៅចំពោះមុខគណៈកម្មាធិការសេវាកម្មប្រដាប់អាវុធរបស់សភា កាលពីថ្ងៃអង្គារ (ទី១៩ ខែកញ្ញា) ដោយលោកបានអត្ថាធិប្បាយពីការបង្កើនសម្ពាធយោធារបស់ប្រទេសចិនមកលើកោះតៃវ៉ាន់។

លោក Ratner បាននិយាយថា មន្ត្រីការពារជាតិជឿជាក់ថា ផ្អែកលើការវិភាគរបស់ពួកគេថា កោះតៃវ៉ាន់នឹងមានឱកាសជាច្រើនជាមួយសហគមន៍អន្តរជាតិ ដើម្បីធានាបាននូវការផ្ដល់ជូនធនធានឧស្សាហកម្ម វត្ថុធាតុដើម ថាមពល និងធាតុផ្សំសំខាន់ៗផ្សេងទៀត ប្រសិនបើមានការបិទច្រកចេញចូលពីសំណាក់យោធារបស់ចិន។

ជាមួយគ្នានេះ លោក Ratner បាននិយាយថា ការបិទច្រកចេញចូលនេះ «នឹងមានហានិភ័យកើនឡើងកាន់តែខ្លាំង» សម្រាប់ប្រទេសចិន ដែលចិនខ្លួនឯងផ្ទាល់ទំនងជាត្រូវពិចារណាថា តើនៅទីបំផុតខ្លួនមានឆន្ទៈ ក្នុងការចាប់ផ្តើមវាយប្រហារលើនាវាដែនសមុទ្រពាណិជ្ជកម្ម ឬក៏អត់។ បន្ថែមពីលើនោះ លោកបានសង្កត់ធ្ងន់ថា នេះនឹងកា្លយជា «កំហុសឆ្គងដ៏ធំ»ជាក់ជាមិនខាន សម្រាប់ទីក្រុងប៉េកាំង។

ចុងក្រោយ លោក Ratner ក៏បានលើកឡើងដែរថា ទីក្រុងវ៉ាស៊ីនតោនគួរតែបន្តរក្សាគោលនយោបាយនៃភាពមិនច្បាស់លាស់ជាយុទ្ធសាស្ត្រដ៏យូរអង្វែងរាប់ទសវត្សរ៍របស់ខ្លួន ចំពោះកោះតៃវ៉ាន់ ដោយលោកបានបញ្ជាក់បន្ថែមថា ផលប៉ះពាល់នៃការផ្លាស់ប្តូរគោលនយោបាយរបស់សហរដ្ឋអាមេរិក ចំពោះភាពច្បាស់លាស់ជាយុទ្ធសាស្ត្រ «នឹងបង្កើនភាពតានតឹងផ្នែកនយោបាយ និងធ្វើឲ្យជម្លោះកាន់តែកើនឡើង»៕