តុលាការឧក្រិដ្ឋកម្មអន្តរជាតិ (ICC) កាលពីថ្ងៃអង្គារ (ទី១៩ ខែកញ្ញា) បានបញ្ចេញឲ្យដឹងអំពីហេតុការណ៍វាយប្រហារតាមប្រព័ន្ធអ៊ិនធឺណេត ដែលនេះជាការរំលោភលើស្ថាប័នអន្តរជាតិដ៏ធំបំផុតមួយរបស់ពិភពលោក។

ICC បាននិយាយថា ខ្លួនបានរកឃើញសកម្មភាពមិនធម្មតានៅលើបណ្តាញកុំព្យូទ័ររបស់ខ្លួន កាលពីចុងសប្តាហ៍មុន ដែលជំរុញឲ្យមានការឆ្លើយតបដែលនៅតែបន្ត។ តែយ៉ាងណាក្ដី អ្នកនាំពាក្យបានបដិសេធមិនធ្វើអត្ថាធិប្បាយពាក់ព័ន្ធនឹងករណីនេះថា តើការលួចចូលទិន្នន័យនេះធ្ងន់ធ្ងរកម្រិតណា ថាតើមានការដោះស្រាយទាំងស្រុង ឬនៅ ឬថាតើអ្នកណាអាចនៅពីក្រោយការវាយប្រហារនេះ។

ICC គឺជាតុលាការឧក្រិដ្ឋកម្មសង្គ្រាមអចិន្ត្រៃយ៍ នៅទីក្រុងឡាអេ ប្រទេសហូឡង់ ដែលបង្កើតឡើងក្នុងឆ្នាំ២០០២ ដើម្បីកាត់ទោសឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ។ រដ្ឋអាជ្ញានៅតុលាការបច្ចុប្បន្នកំពុងធ្វើការស៊ើបអង្កេតចំនួន ១៧ករណី លើស្ថានភាពនៅក្នុងប្រទេសអ៊ុយក្រែន អ៊ូហ្គង់ដា វេណេហ្ស៊ុយអេឡា អាហ្វហ្គានីស្ថាន និងហ្វីលីពីន ក្នុងចំណោមប្រទេសដទៃទៀត។

កាលពីខែមីនា តុលាការបានចេញដីកាចាប់ខ្លួនប្រធានាធិបតីរុស្ស៊ី លោក វ្ល៉ាឌីមៀរ ពូទីន ពីបទសង្ស័យនិរទេសកុមារ ដោយខុសច្បាប់ពីអ៊ុយក្រែន។ តែវិមានក្រឹមឡាំងបដិសេធការចោទប្រកាន់ និងយុត្តាធិការរបស់តុលាការនេះ៕