ប្រព័ន្ធផ្សព្វផ្សាយក្នុងតំបន់បានរាយការណ៍តាមវីដេអូចេញផ្សាយកាលពីថ្ងៃអង្គារ បានបង្ហាញព្យុះកំណាចដ៏ខ្លាំងបានវាយបោកបក់បំផ្លាញខេត្ត Jiangsu ប្រទេសចិនភាគខាងកើត បណ្តាលឲ្យយ៉ាងហោចណាស់មនុស្សម្នាក់ស្លាប់ក្នុងពេលមានការព្រមានពីភ្លៀងធ្លាក់និងខ្យល់បក់ខ្លាំងនៅក្នុងតំបន់ជាច្រើន។ ព្យុះកំណាចកើតឡើងតែមួយភ្លែតប៉ុន្តែខ្លាំង ដោយវីដេអូប្រព័ន្ធផ្សព្វផ្សាយសង្គមបានបង្ហាញពីរថយន្តក្រឡាប់ បណ្តាញអគ្គីសនីបាក់រលំ និងកម្ទេចកម្ទីហោះហើរ ដែលភាគច្រើនបានពង្រាយនៅលើដងផ្លូវនៃក្រុង Suqian ជាទីក្រុងនៅភាគខាងជើងខេត្ត។

សារព័ត៌មានរ៉យទ័រ អាចបញ្ជាក់ពីទីតាំងនៃវីដេអូទាំងនេះ មកពីអគារនៅក្បែរនោះ មានស្លាកសញ្ញា និងទទឹងផ្លូវដែលផ្គូរផ្គងជាមួយផែនទីផ្កាយរណប និងរូបភាពឯកសារនៃតំបន់នេះ។

សារព័ត៌មានរ៉យទ័រ ពុំអាចបញ្ជាក់ដោយឯករាជ្យពីកាលបរិច្ឆេទពីវីដេអូដែលត្រូវបានថតនោះទេ។ ប្រព័ន្ធផ្សព្វផ្សាយ CCTV និយាយថា មនុស្សម្នាក់បានស្លាប់ និង៣នាក់រងរបួស ហើយលំនៅឋាន ៥២ខ្នង រងការខូចខាត។

ឧបទ្ទវហេតុចុងក្រោយនៅសប្តាហ៍នេះនៃអាកាសធាតុដ៏មហន្តរាយ និងមានមនុស្សស្លាប់ ជំរុញឲ្យអាជ្ញាធរ អំពាវនាវឲ្យមានការប្រុងប្រយ័ត្ន ចំពោះខ្យល់បោកបក់ខ្លាំងនៅតំបន់ឆ្នេរ នៅជិតសមុទ្រលឿង នៅខេត្ត Jiangsu ។