ក្រុមអ្នកស្រាវជ្រាវ បានរកឃើញវិធីសាស្រ្តថ្មី ដើម្បីស្តាកាបូនឌីអុកស៊ីតដែលមានអាយុកាលរាប់ពាន់ឆ្នាំមកហើយ ហើយនិងការពារវាពីការបញ្ចេញទៅកាន់បរិយាកាស ក៏ដូចជាបន្តកិច្ចខិតខំបន្ថែមទៀត ដើម្បីកំណត់ការបំភាយឧស្ម័នផ្ទះកញ្ចក់ពីប្រភពជាច្រើន។

 ការស្រូបកាបូន ឬការចាប់យកកាបូន តាមធម្មតាពាក់ព័ន្ធនឹងការបញ្ចេញកាបូនពីបរិយាកាស បង្រួមវា ហើយរក្សាទុកវានៅក្រោមដី។

 ប៉ុន្តែក្រុមហ៊ុនដោះស្រាយបម្រែបម្រួលអាកាសធាតុ Rewind ដែលមានមូលដ្ឋាននៅប្រទេសអ៊ីស្រាអែល បានធ្វើឲ្យមានការចាប់អារម្មណ៍ពីដំណើរការធម្មជាតិរបស់ផែនដីសម្រាប់ដំណោះស្រាយនវានុវត្តន៍លើការស្តុកកាបូន។ នេះបើយោងតាមការអះអាងរបស់លោក Ram Amar ដែលជាប្រធានប្រតិបត្តិក្រុមហ៊ុន Rewind បាននិយាយប្រាប់ទូរទស្សន៍ ABC News។

 លោក Amar និយាយថា វិធីសាស្រ្តនេះ ពាក់ព័ន្ធនឹងការនាំយករុក្ខជាតិ និងជីវម៉ាស់ផ្សេងទៀត ដែលអាចស្រូបយកបរិមាណដ៏ច្រើនរបស់កាបូន រួចស្តុកនៅបាតសមុទ្រខ្មៅ។

 លោកបន្តថា ពួកយើងមើលធម្មជាតិ ដោយសារតែម៉ាស៊ីនល្អបំផុតចាប់កាបូនឌីអុកស៊ីតពីខ្យល់សព្វថ្ងៃគឺជារុក្ខជាតិ។

 លោក Amar ថា រុក្ខជាតិជាពិសេសគឺដើមឈើ ត្រូវបានគេដឹងច្បាស់ពីសមត្ថភាពរបស់វាក្នុងការចាប់យក និងបណ្តេញកាបូនឌីអុកស៊ីតចេញពីបរិយាកាស។ ពេលដែលរុក្ខជាតិធ្វើរស្មីសំយោគ វានឹងនាំកាបូនឌីអុកស៊ីតចេញពីខ្យល់ ដែលធ្វើឲ្យវាលូតលាស់ ហើយបន្ទាប់មក ពេលដែលវាងាប់ និងរលួយ វានឹងបញ្ចូញកាបូនត្រឡប់ទៅកាន់ខ្យល់វិញ៕