ការិយាល័យប្រធានាធិបតីនៅទីក្រុងដាម៉ាស់ និយាយនៅក្នុងសេចក្តីថ្លែងការណ៍កាលពីថ្ងៃអង្គារថា ប្រធានាធិបតីស៊ីរីលោក បាសា អាល់ អាសាដ នឹងធ្វើដំណើរទៅកាន់ប្រទេសចិនក្នុងសប្តាហ៍នេះ សម្រាប់កិច្ចប្រជុំកំពូលទ្វេភាគីជាមួយសមភាគីចិនលោកប្រធានាធិបតី ហ្ស៊ី ជីនពីង ។

សេចក្តីថ្លែងការណ៍បន្តថា លោក អាសាដ ស្រ្តីទី១ស៊ីរី អាស្មា អាល់ អាសាដ និងគណៈប្រតិភូជាន់ខ្ពស់ នឹងធ្វើដំណើរទៅកាន់ប្រទេសចិននៅថ្ងៃព្រហស្បតិ៍នេះ សម្រាប់ជំនួបជាច្រើននៅទីក្រុងប៉េកាំង និងទីក្រុងឆាងចូវ ។ លោក អាសាដ និងលោក ហ្ស៊ី នឹងមានជំនួបកំពូលស៊ីរី-ចិន ។

គួរឲ្យដឹងថា លោក អាសាដ បានបំពេញទស្សនកិច្ចទៅកាន់ប្រទេសចិនកាលពីឆ្នាំ ២០០៤ ដើម្បីជួបជាមួយអតីតប្រធានាធិបតីចិនលោក ហ៊ូ ជីនតាវ ។ កាលនោះវាគឺជាដំណើរទស្សនកិច្ចលើកដំបូងដោយប្រមុខរដ្ឋស៊ីរី មកកាន់ប្រទេសចិន ចាប់តាំងពីប្រទេសទាំង ២ បានបង្កើតទំនាក់ទំនងការទូត កាលពីឆ្នាំ ១៩៥៦ ។

ចិនដូចគ្នានឹងសម្ព័ន្ធមិត្តដ៏សំខាន់រុស្ស៊ី និងអ៊ីរ៉ង់របស់ស៊ីរី បានរក្សាទំនាក់ទំនងមួយនេះ បើទោះបីជាប្រទេសផ្សេងទៀតផ្តាច់ខ្លួនចេញពីលោក អាសាដ ក៏ដោយ ពាក់ព័ន្ធនឹងការចាត់វិធានការបង្រ្កាបយ៉ាងឃោឃៅរបស់លោកលើបាតុកម្មប្រឆាំងរដ្ឋាភិបាលដែលបានផ្ទុះឡើងកាលពីឆ្នាំ ២០១១ ។

ក្នុងនាមជាសមាជិកអចិន្រ្តៃយ៍របស់ក្រុមប្រឹក្សាសន្តិសុខអង្គការសហប្រជាជាតិ ចិនតែងតែប្រើសិទ្ធិវេតូ សេចក្តីសម្រេចលើស៊ីរី ដែលរួមទាំងច្រើនលើក ក្នុងការបន្តប្រតិបត្តិការជំនួយឆ្លងកាត់ព្រំដែនចូលទៅកាន់តំបន់នៅក្រៅការគ្រប់គ្រងរបស់រដ្ឋាភិបាលស៊ីរី ៕