ភ្នំពេញ ៖ មន្ទីរពេទ្យព្រះអង្គឌួង សហការជាមួយមជ្ឈមណ្ឌលជាតិផ្តល់ឈាម ប្រារព្វកម្មវិធីបរិច្ចាគឈាមក្រោមប្រធានបទ“សង្គ្រោះជីវិត គឺបរិច្ចាគឈាមទាំងអស់គ្នា" ដើម្បីជួយសង្គ្រោះជីវិតមនុស្សដែលត្រូវការឈាមជាចាំបាច់។

កម្មវិធីបរិច្ចាគឈាមនេះបានប្រព្រឹត្តទៅនៅរសៀលថ្ងៃទី២០ ខែកញ្ញា ឆ្នាំ២០២៣នេះ ក្រោមអធិបតីភាពឯកឧត្តមវេជ្ជបណ្ឌិត ស៊ិក ប៊ុណ្ណា រដ្ឋលេខាធិការក្រសួងសុខាភិបាល តំណាងដ៏ខ្ពស់ខ្ពស់របស់ឯកឧត្តមសាស្ដ្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ឯកឧត្តមវេជ្ជបណ្ឌិត សុខ ផេង រដ្ឋលេខាធិការក្រសួងសុខាភិបាល ឯកឧត្តមអនុរដ្ឋលេខាធិការ និងឯកឧត្តមអគ្គនាយក-អគ្គនាយករង បច្ចេកទេសសុខាភិបាលព្រមទាំងលោក លោកស្រីដែលជាថ្នាក់ដឹកនាំមន្ទីរពេទ្យព្រះអង្គឌួង និងមជ្ឈមណ្ឌលជាតិផ្តល់ឈាមជាច្រើនទៀត។

ឯកឧត្តមសាស្ត្រាចារ្យរង លូ លីឃាង នាយកមន្ទីរពេទ្យព្រះអង្គឌួង បានមានប្រសាសន៍ថា ថ្ងៃនេះជាឱកាសដ៏វិសេសវិសាល ដោយតាមអនុសាសន៍ដ៏ខ្ពង់ខ្ពស់របស់ឯកឧត្តមសាស្ត្រាចារ្យរដ្ឋមន្ត្រី មន្ទីរពេទ្យព្រះអង្គឌួង បានសហការជាមួយមជ្ឈមណ្ឌលជាតិផ្តល់ឈាម ប្រារព្ធកម្មវិធីបរិច្ចាគឈាមនៅមន្ទីរពេទ្យព្រះអង្គឌួង ឆ្នាំ២០២៣ ក្រោមប្រធានបទ "សង្គ្រោះជីវិត គឺបរិច្ចាគឈាមទាំងអស់គ្នា” ដែលជាការចូលរួមបរិច្ចាគឈាមដោយស្ម័គ្រចិត្តពីមន្ត្រីរាជការក្រោមឱវាទមន្ទីរពេទ្យព្រះអង្គឌួង ដែលកន្លងមកមន្ទីរពេទ្យក៏ធ្លាប់បាន ធ្វើការបរិច្ចាគឈាមជារឿយៗផងដែរ ដើម្បីអាចមានឈាមគ្រប់គ្រាន់ជួយសង្គ្រោះជីវិតមនុស្ស ហើយមន្ទីរពេទ្យព្រះអង្គឌួងបានទទួលឈាមជាមធ្យម ៤០ប្លោក ក្នុងមួយខែ ពីមជ្ឈមណ្ឌលជាតិផ្ដល់ឈាម។ សម្រាប់កិច្ចសហការនេះរវាងមន្ទីរពេទ្យនិងមជ្ឈមណ្ឌលផ្តល់ឈាមនឹងបន្តនិងពង្រឹងបន្ថែមទៀត ទៅថ្ងៃខាងមុខ។

ទន្ទឹមគ្នានោះដែរឯកឧត្តមវេជ្ជបណ្ឌិត ស៊ិក ប៊ុណ្ណា បានអបអរសាទរចំពោះមន្ត្រី បុគ្គលិកសុខាភិបាលនៃមន្ទីរពេទ្យព្រះអង្គឌួងប្រមាណ១២០នាក់ ដែលបានចុះឈ្មោះបរិច្ចាគឈាមដោយស្ម័គ្រចិត្ត ក្នុងកម្មវិធីបរិច្ចាគឈាមដោយទៀងទាត់របស់មន្ទីរពេទ្យ ក្រោមពាក្យស្លោក " សង្គ្រោះជីវិតគឺបរិច្ចាគឈាមទាំងអស់គ្នា "។ ការផ្តល់ឈាម គឺជួយជីវិត អ្នកដែលត្រូវការឈាម អ្នកដែលមានជំងឺស្លេកស្លាំង អ្នកដែលបាត់បង់ឈាមភ្លាមៗ អ្នកមានជំងឺគ្រាប់ឈាមមួយចំនួន និងអ្នកដែលមានជំងឺមហារីកជាដើម។ កាយវិការសប្បុរសធម៌នេះបង្ហាញពីទឹកចិត្តរបស់គ្រូពេទ្យដែលក្រៅពីតួនាទី ភារកិច្ច ជាមន្ត្រីរាជការ ជាអ្នកប្រកបវិជ្ជាជីវៈសុខាភិបាលគោរពក្រមសីលធម៌ត្រឹមត្រូវតែប៉ុណ្ណោះទេ លើសពីនេះគ្រូពេទ្យយើង បានបរិច្ចាគឈាម ជូនអ្នកជំងឺដែលត្រូវការឈាមជាចាំបាច់ថែមទៀត។ បរិច្ចាគឈាម គឺជាទង្វើសប្បុរសមួយដែលអាចជួយសង្គ្រោះជីវិតមនុស្សបាន។

ឯកឧត្តម រដ្ឋលេខាធិការ បានសំដែងនូវការកោតសរសើរចំពោះថ្នាក់ដឹកនាំ និងមន្ត្រីបុគ្គលិកសុខាភិបាលនៃមន្ទីរពេទ្យព្រះអង្គឌួង ដែលបានផ្តល់សេវាសុខាភិបាលជូនប្រជាជនបានល្អប្រសើរ ស្របតាមយុទ្ធសាស្ត្រជាអាទិភាពរបស់ក្រសួងសុខាភិបាល ដើម្បីចូលរួមចំណែកអនុវត្តឲ្យទទួលបានជោគជ័យនូវកម្មវិធីគោលនយោ​បាយ​ជាអាទិភាពចំនួន៦ សម្រាប់ការចាប់ផ្តើមអនុវត្តភ្លាមក្នុងឆ្នាំ២០២៣ ក្នុងនោះអាទិភាពទីមួយគឺ "ការពង្រីកសេវាថែទាំសុខភាពឆ្ពោះទៅរកការគ្របដណ្តប់សុខភាពជាសកល" របស់រាជរដ្ឋាភិបាលក្រោមការដឹកនាំដ៏ ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា"។

នៅក្នុងឱកាសនោះដែរ ឯកឧត្តមវេជ្ជបណ្ឌិត សុខ ផេង បានណែនាំដល់មជ្ឈមណ្ឌលជាតិផ្តល់ឈាម ត្រូវយកចិត្តទុកដាក់ ដល់សប្បុរសជនដែលបានស្ម័គ្រចិត្តបរិច្ចាគឈាមដោយឱ្យជាចំណីអាហារ ឬកាដូនៅពេលពួកគាត់មកបរិច្ចាគឈាមរួច ដើម្បីបង្កើនគ្រាប់ឈាមឡើងវិញ។ ទន្ទឹមនឹងនេះត្រូវយកចិត្តទុកដាក់ទៅលើសុវត្តិភាពឈាម ពោលគឺឈាមដែលយកចេញពីមជ្ឈមណ្ឌលជាតិផ្តល់ឈាម ត្រូវធានាសុវត្តិភាពដល់អ្នកជំងឺ និងជំរុញធ្វើយ៉ាងណាឱ្យប្រជាពលរដ្ឋចូលរួមបរិច្ចាគឈាម ឱ្យបានកាន់តែច្រើនបន្ថែមទៀត ខណៈបច្ចុប្បន្នអត្រាបរិច្ចាគឈាមដោយស្ម័គ្រចិត្តរបស់ប្រជាពលរដ្ឋនៅមានកម្រិតនៅឡើយ៕ អត្ថបទ រដ្ឋា