សម្តេចសង្ឃកាតូលិក ហ្វ្រង់ស៊ីស នៅថ្ងៃពុធ (ទី២០ ខែកញ្ញា) នេះ បានមានព្រះបន្ទូលអំពាវនាវឲ្យបញ្ចប់ជម្លោះ នៅតំបន់ណាហ្គ័រណូ-ការ៉ាបាក់ (Nagorno-Karabakh) ដែលជាតំបន់ផ្ដាច់ចេញរបស់ជនជាតិភាគតិចអាមេនី ក្នុងប្រទេសអាស៊ែរបៃហ្សង់ និងដែលបានរងការវាយប្រហារពីសំណាក់កងកម្លាំងអាស៊ែរបៃហ្សង់ ក្នុងរយៈពេល ២៤ម៉ោងកន្លងមកនេះ។

អំឡុងការជួបជុំប្រចាំសប្តាហ៍របស់ព្រះអង្គ នៅទីលាន St Peter's Square របស់បុរីវ៉ាទីកង់ ក្នុងទីក្រុងរ៉ូម ប្រទេសអ៊ីតាលី សម្ដេច ប៉ាប បានមានព្រះបន្ទូលថា៖ «ជាថ្មីម្តងទៀត ខ្ញុំសូមអំពាវនាវដល់ភាគីពាក់ព័ន្ធទាំងអស់ និងសហគមន៍អន្តរជាតិឲ្យបញ្ឈប់ការប្រើអាវុធរបស់ពួកគេ ហើយខិតខំប្រឹងប្រែងស្វែងរកដំណោះស្រាយដោយសន្តិវិធី»។

សូមបញ្ជាក់ថា អាស៊ែរបៃហ្សង់ កាលពីថ្ងៃអង្គារ (ទី១៩ ខែកញ្ញា) បានចាប់ផ្តើមប្រតិបត្តិការយោធា នៅក្នុងតំបន់នេះ ដោយនិយាយថា ខ្លួនត្រូវការស្តារសណ្តាប់ធ្នាប់រដ្ឋធម្មនុញ្ញ និងបណ្តេញអង្គភាពយោធាអាមេនីចេញពីទឹកដីរបស់ខ្លួន។ ប្រទេសអាមេនី បានបដិសេធថា មិនមានកម្លាំងរបស់ខ្លួនក្នុងតំបន់នេះនោះទេ។

តំបន់ការ៉ាបាក់ត្រូវបានទទួលស្គាល់ជាអន្តរជាតិថា ជាទឹកដីរបស់ប្រទេសអាស៊ែបៃហ្សង់ ប៉ុន្តែផ្នែកខ្លះនៃតំបន់នេះត្រូវបានគ្រប់គ្រងដោយអាជ្ញាធរជនជាតិអាមេនី ដែលបំបែកខ្លួន ដោយពួកគេនិយាយថា តំបន់នេះជាស្រុកកំណើតដូនតារបស់ពួកគេ។ តំបន់នេះស្ថិតនៅចំកណ្តាលនៃការមានសង្រ្គាម ២ដង ដែលចុងក្រោយបំផុត កើតឡើងក្នុងឆ្នាំ២០២០ គិតចាប់តាំងពីការដួលរលំនៃសហភាពសូវៀតឆ្នាំ១៩៩១៕