នាយករដ្ឋមន្ត្រីអ៊ីតាលី លោកស្រី Giorgia Meloni កាលពីថ្ងៃអង្គារ (ទី១៩ ខែកញ្ញា) បាននិយាយថា លោកស្រី នឹងអំពាវនាវឲ្យសហគមន៍អន្តរជាតិជួយដោះស្រាយវិបត្តិជនអន្តោប្រវេសន៍របស់ប្រទេសលោកស្រី ដោយពណ៌នាថា នេះជាបញ្ហាស្រដៀងនឹងការជិះជាន់លើទាសភាពដែរ។

លោកស្រី Meloni គ្រោងនឹងថ្លែងទៅកាន់មហាសន្និបាតអង្គការសហប្រជាជាតិ (UN) ជុំវិញប្រធានបទនេះ នៅថ្ងៃព្រហស្បតិ៍ (ទី២១ ខែកញ្ញា)។ មន្ត្រីរដ្ឋាភិបាលបានឲ្យដឹងថា រដ្ឋាភិបាលអ៊ីតាលី ដែលកំពុងប្រឹងប្រែងដោះស្រាយការកើនឡើងនៃការមកដល់របស់ជនអន្តោប្រវេសន៍ កាលពីថ្ងៃចន្ទ (ទី១៨ ខែកញ្ញា) បានអនុម័តវិធានការ ដើម្បីពន្យារពេលវេលា ដែលអ្នកទាំងនោះអាចត្រូវបានឃុំខ្លួន និងធានាថា មនុស្សកាន់តែច្រើន ដែលមិនមានសិទ្ធិស្នាក់នៅស្របច្បាប់ ត្រូវបានធ្វើមាតុភូមិនិវត្តន៍។

ចំណាត់ការនេះបានកើតឡើងបន្ទាប់ពីជនអន្តោប្រវេសន៍ជិត ១០.០០០នាក់ បានទៅដល់កោះ Lampedusa នៅភាគខាងត្បូងប្រទេសអ៊ីតាលី កាលពីសប្តាហ៍មុន ដោយបណ្ដាលឲ្យប៉ះពាល់យ៉ាងខ្លាំងដល់ភាពជឿជាក់នៃគណបក្សស្ដាំនិយមរបស់លោកស្រី Meloni ដែលបានឡើងកាន់តំណែង កាលពីឆ្នាំមុន ដោយប្តេជ្ញាថា នឹងទប់ស្កាត់ការធ្វើអន្តោប្រវេសន៍ខុសច្បាប់។

យោងតាមទិន្នន័យរបស់រដ្ឋាភិបាលបានឲ្យដឹងថា ជនអន្តប្រវេសន៍ជិត ១៣០.០០០នាក់បានមកដល់ប្រទេសអ៊ីតាលីក្នុងឆ្នាំនេះ ពោលគឺជិតពីរដងនៃតួលេខ សម្រាប់រយៈពេលដូចគ្នានៃឆ្នាំ២០២២៕