ប្រជាជនលីប៊ីជាមួយនឹងអឌ្ឍចន្ទក្រហម និងគណៈកម្មាធិការអន្តរជាតិនៃកាកបាទក្រហម (ICRC) នៅក្នុងទីក្រុង Derna ដែលរងគ្រោះដោយទឹកជំនន់ និយាយអំពីស្ថានភាពដ៏លំបាក ដែលពួកគេកំពុងជួបប្រទះ ខណៈដែលពួកគេព្យាយាមបង្ហាញសាកសពរបស់មិត្តភក្តិ សាច់ញាតិ និងបងប្អូនជនរួមជាតិរបស់ពួកគេ។

លោក Mohamed Basheer Basheer ប្រធានក្រុមជួយសង្គ្រោះនៅ ICRC បាននិយាយថា៖ «ជារៀងរាល់ថ្ងៃ យើងស្រង់សាកសពចេញ ក្នុងចំនួនហួសពីការបរិយាយ ដែលមិនអាចគិតដល់រូបនោះបានឡើយ។ ស្ថានភាពគឺគួរឲ្យរន្ធត់ណាស់។ ផ្លូវទាំងមូលនានាបានបាត់អស់រលីងតែម្ដង»។

នៅផ្នែករបស់លោក លោក Hisham Abdullah ជាសមាជិកនៃអឌ្ឍចន្ទក្រហមលីប៊ី រំលឹកដល់ទិដ្ឋភាពពីក្មេងតូចម្នាក់ ដែលមកជាមួយក្រុមទាហាន ដើម្បីស្វែងរកគ្រួសាររបស់គេ នៅតាមផ្លូវនានា ដែលត្រូវជន់លិច។ លោកបានបន្ថែមថា តើអ្នកស្រុកក្រុង Derna ទាំងអស់ ទប់ទឹកភ្នែករបស់ពួកគេមិនឲ្យស្រក់ចុះមកបានដោយរបៀបណាទៅ។

សូមរំលឹកថា ខ្យល់ព្យុះដ៏កំណាច កាលពីថ្ងៃទី១០ ខែកញ្ញា បានបំបាក់ទំនប់វារីអគ្គិសនីចំនួន២ ដោយបង្កបានជាទឹកជំនន់ជន់លិចភាគខាងកើតទីក្រុង Derna របស់លីប៊ី និងបានសម្លាប់មនុស្សរាប់ពាន់នាក់។

មួយសប្តាហ៍បន្ទាប់ពីទឹកជំនន់បានបំផ្លាញតំបន់សំខាន់ៗជាច្រើនរបស់ទីក្រុង អ្នកស្រុកទីក្រុង Derna ដែលពេញទៅដោយកំហឹង ធ្វើបាតុកម្មនៅតាមដងផ្លូវ និងបានដុតផ្ទះរបស់អភិបាលក្រុង។ ពួកគេចោទអាជ្ញាធរថា មិនបានថែទាំទំនប់ ដែលការពារទីក្រុង និងមិនបានជម្លៀសប្រជាជនចេញមុនពេលមានព្យុះ៕