ភ្នំពេញ៖ មន្ត្រីជាន់ខ្ពស់នៃរាជរដ្ឋាភិបាលកម្ពុជាអាណត្តិទី៧ និងបុគ្គលិកនៃកម្មវិធីស្បៀងអាហារពិភពលោករបស់អង្គការសហប្រជាជាតិ (WFP) កំពុងបំពេញទស្សនកិច្ចសិក្សានៅសាធារណរដ្ឋកូរ៉េ (កូរ៉េខាងត្បូង) ក្នុងគោលបំណងពង្រឹងកម្មវិធីផ្ដល់ស្បៀងអាហារតាមសាលារៀននៅកម្ពុជា។ បេសកកម្មបំពេញទស្សនកិច្ចនេះត្រូវបានគាំទ្រដោយទីភ្នាក់ងារសហប្រតិបត្តិការអន្តរជាតិកូរ៉េ (KOICA) ហើយតាមរយៈបេសកកម្មនេះ គណ:ប្រតិភូទាំងមូលនឹងបានសិក្សាស្វែងយល់ដោយផ្ទាល់អំពីគំរូជោគជ័យរបស់កម្មវិធីអាហារតាមសាលារបស់ប្រទេសកូរ៉េ។

លោកស្រី គ្លែរ កូណាន់ នាយិកាប្រចាំប្រទេសរបស់ WFP នៅកម្ពុជាមានប្រសាសន៍ថា “ជាមួយនឹងកម្មវិធីផ្ដល់ស្បៀងអាហារតាមសាលារៀនដោយប្រើប្រាស់កសិផលសហគមន៍ (HGSF) របស់យើង កម្ពុជាមានគោលបំណងផ្តល់អាហារដល់កុមារផង ហើយស្របពេលជាមួយនោះ ក៏លើកកម្ពស់កែលម្អអាហារូបត្ថម្ភ ពង្រឹងការអប់រំនិងការអភិវឌ្ឍន៍ជនបទ និងបង្កើនសន្តិសុខស្បៀងផងដែរ។ ជំនួយគាំទ្ររបស់ KOICAកន្លងមកទៅលើកម្មវិធី បានផ្ដល់នូវការកែប្រែគួរឱ្យកត់សម្គាល់ទៅលើការកសាងហេដ្ឋារចនាសម្ព័ន្ធសំខាន់ៗតាមសាលារៀន និងលើកកម្ពស់សមត្ថភាពរបស់អ្នកអនុវត្តកម្មវិធី។

ជំនួយនេះក៏បាន រួមចំណែកទៅដល់សេដ្ឋកិច្ចក្នុងស្រុកផងដែរ តាមរយៈការលើកកម្ពស់ការដាំដុះកសិផលតាមផ្ទះសម្រាប់ផ្គត់ផ្គង់តាមមូលដ្ឋាន ការបង្កើនភាពអង់អាចរបស់កសិករ ការលើកកម្ពស់កំណើនកសិកម្ម និងការបង្កើតនូវប្រព័ន្ធស្បៀងមួយដែលប្រកបដោយនិរន្តរភាព។

គណៈប្រតិភូដែលដឹកនាំដោយឯកឧត្តមណាតប៊ុនរឿន រដ្ឋលេខាធិការនៃក្រសួងអប់រំនិងដែលរួមមានសមាសភាពមន្ត្រីសំខាន់ៗមកពីក្រសួងអប់រំ ក្រសួងកសិកម្ម ក្រសួងសេដ្ឋកិច្ចនិងហិរញ្ញវត្ថុ ក្រុមប្រឹក្សាជាតិគាំពារសង្គម និងក្រុមប្រឹក្សាស្ដារអភិវឌ្ឍវិស័យកសិកម្មនិងជនបទ នឹងបានសិក្សាស្វែងយល់អំពីការអនុវត្ត កម្មវិធីផ្ដល់ស្បៀងអាហារតាមសាលារៀននៅប្រទេសកូរ៉េ ដោយផ្តោតលើគោលនយោបាយ យន្តការអនុវត្តការងារ និងការសម្របសម្រួលអន្តរក្រសួង។

គណៈប្រតិភូនឹងចូលរួមជាមួយសមភាគីកូរ៉េ ដើម្បីសង្កេតមើលដំណើរការលទ្ធកម្មស្បៀងតាមមូលដ្ឋាន និងទស្សនកិច្ចនៅតាមសាលារៀនក្នុងសហគមន៍ដែលទើបកំពុងអនុវត្តកម្មវិធីនេះ។ បន្ទាប់មក គណៈប្រតិភូនឹងជួបជាមួយមន្ត្រីជាន់ខ្ពស់នៅទីស្នាក់ការកណ្តាលរបស់ KOICA ដើម្បីស្វែងយល់​បន្ថែមអំពីការអនុវត្តកម្មវិធី ការគ្រប់គ្រង ការអភិវឌ្ឍគោលនយោបាយ យុទ្ធសាស្រ្ត​ហិរញ្ញវត្ថុ​បែបច្នៃប្រឌិត និងតួនាទីរបស់វិទ្យាសាស្ត្រ បច្ចេកវិទ្យា និងការច្នៃប្រឌិតក្នុងការរចនាកម្ម​វិធីប្រកបដោយនិរន្តរភាព និងបង្កើតកិច្ចសហការប្រកបដោយប្រសិទ្ធភាពជាមួយដៃគូចម្រុះ និងភាគីពាក់ព័ន្ធ។

ឯកឧត្តម ហង់ ជួនណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡា បាន​សង្កត់ធ្ងន់លើសារៈសំខាន់នៃការផ្តល់អាទិភាពដល់សុខភាពសិស្ស តាមរយៈកម្មវិធី​អាហារូបត្ថម្ភ និងការគ្រប់គ្រងគុណភាពអាហារនៅតាមសាលារៀន ដែលជាកម្លាំងចលករដ៏មាន​ឥទ្ធិពលសម្រាប់កំណែទម្រង់ការអប់រំក្នុងអាណត្តិទី៧នៃរាជរដ្ឋាភិបាល។

“ដំណើរទស្សនកិច្ចសិក្សាទៅប្រទេសកូរ៉េនេះ ស្របទៅតាមចក្ខុវិស័យរបស់កម្ពុជាសម្រាប់ការអភិវឌ្ឍប្រកបដោយនិរន្តរភាព និងបរិយាប័ន្ន ដែលអនុញ្ញាតឲ្យមានការចែករំលែកចំណេះដឹងរវាងប្រទេសទាំងពីរ។ វាគឺជាព្រឹត្តិការណ៍សំខាន់មួយក្នុងកិច្ចសហការរវាងកម្ពុជានិងកូរ៉េ ដែលអាចធ្វើទៅបានតាមរយៈជំនួយគាំទ្រដ៏មានតម្លៃរបស់ KOICA។ ដំណើរទស្សនកិច្ចនេះបញ្ជាក់ពីភាពជាដៃគូដ៏ជ្រាលជ្រៅរវាងប្រទេសទាំងពីររបស់យើង និងបង្ហាញពីការប្តេជ្ញាចិត្តរួមគ្នារបស់យើងក្នុងការលើកកម្ពស់ការអប់រំ អាហារូបត្ថម្ភ និងការអភិវឌ្ឍជនបទ។” ឯកឧត្តម ហង់ជួន ណារ៉ុន បានបញ្ជាក់ដូច្នេះ ដោយសេចក្ដីសាទរ និងបានបន្ថែមថា តាមរយៈកម្មវិធីជំនួយចម្រុះរបស់ប្រទេសកូរ៉េ កម្ពុជាកំពុងត្រួសត្រាយផ្លូវឆ្ពោះទៅកាន់អនាគតដ៏ត្រចះត្រចង់សម្រាប់វិស័យអប់រំ អាហារូបត្ថម្ភ និងការអភិវឌ្ឍប្រកបដោយចីរភាព។

លទ្ធផលនៃដំណើរទស្សនកិច្ចសិក្សានេះនឹងរួមចំណែកយ៉ាងសំខាន់ដល់ការអនុវត្តគោលនយោបាយស្ដីអំពីការផ្តល់ស្បៀងអាហារតាមសាលារៀននៅកម្ពុជា និងការអភិវឌ្ឍកម្មវិធីជាតិ​ផ្ដល់ស្បៀង​អាហារតាមសាលារៀនដោយប្រើប្រាស់កសិផលសហគមន៍ ក្នុងខណៈពេលដែលកម្មវិធីនេះ​កំពុងឈានដល់ដំណាក់កាលសំខាន់ក្នុងការផ្ទេរមកក្នុងការគ្រប់គ្រងទាំងស្រុងរបស់រាជារដ្ឋាភិបាលក្នុងឋានៈយន្តការមួយដ៏សំខាន់នៃបណ្តាញសុវត្ថិភាពសង្គម ។