​បាល់ទាត់៖ ​ក្រុម​តោ​ខៀវ Chelsea បាន​គ្រង​ជើងឯក​ក្រប​ខណ្ឌ UEFA Champions League ជា​លើក​ទី២ ក្នុង​ប្រវត្តិសាស្ត្រ​ក្លិប​ក្រោយ​យកឈ្នះ Manchester City ១-០ កាលពី​ថ្ងៃ​សៅរ៍​វគ្គ​ផ្ដាច់ព្រ័ត្រ​នៅ​ទីក្រុង Porto ប្រទេស​ព័រទុយហ្កាល់​។

​​Kai Havertz ជា​រក​បាន​គ្រាប់​ជ័យជំនះ​ឲ្យ Chelsea នៅ​នាទី​ទី៤២​។​ ជា​ការ​ប្រកួត​វគ្គ​ផ្ដាច់ព្រ័ត្រ​យុទ្ធសាស្ត្រ​រវាង​អ្នកចាត់ការ​ទាំងពីរ Thomas Tuchel និង Pep Guardiola ខណៈ​អ្នកចាត់ការ​សញ្ជាតិ​អាល្លឺម៉ង់​នៅ​ពេល​នេះ​បាន​យកឈ្នះ Pep ៣​ប្រកួត​ជាប់​គ្នា​ហើយ​តាំងពី​មកកាន់​តំណែង​ជំនួស Frank Lampard កាលពី​ខែ​មករា​។ Pep Guardiola ដែល​ការពារ​ជំរើស ១១​នាក់​របស់​ខ្លួន​បាន​ទទួលរង​ការរិះគន់​ជាច្រើន ​ពី​ការ​មិន​ដាក់​ខ្សែបំរើ Rodri និង Fernandinho ដែល​ធ្វើ​អោយ​ប្រព័ន្ធ​លេង​មិន​ស្មុគស្មាញ​សំរាប់ Chelsea ហើយ Manchester City ត្រូវ​រង់ចាំ​បន្ត​ទៀត​ក្នុង​ការ​ស្វែងរក​ជើងឯក​អឺរ៉ុប​ លើកដំបូងក្នុង​ប្រវត្តិសាស្ត្រ​ក្លិប​។​ ​បន្ទាប់ពី​ខក​បំណង​ដឹកនាំ Paris Saint Germain ចាញ់ Bayern Munich នៅ​វគ្គ​ផ្ដាច់ព្រ័ត្រ​រដូវ​កាល​មុន​នោះ​លោក Thomas Tuchel បាន​ក្លាយ​ជា​អ្នកចាត់ការ​អាល្លឺម៉ង់​ទី​៣ ដែល​ដឹកនាំ​ក្រុម​ឈ្នះ​ជើងឯក Champions League ៣​រដូវ​កាល​ចុងក្រោយ​បន្ទាប់ពី Jurgen Klopp ដឹកនាំ Liverpool ឈ្នះ​នៅ​ឆ្នាំ២០១៩ និង Hansi Flick ដឹកនាំ Bayern Munich ឈ្នះ​ឆ្នាំមុន​។​

Chelsea ជា​ក្រុម​អង់គ្លេស​ទី៣ ដែល​ឈ្នះ​ជើងឯក Champions League ២លើក​បន្ទាប់ពី Liverpool និង Manchester United (​មិន​រាប់ European Cup)​។ ​នេះ​ជា​ពាន​អឺរ៉ុប​ទី៤ របស់ Chelsea និយាយ​តែ​ក្រោម​ការវិនិយោគ​របស់​សេដ្ឋី​រុស្ស៊ី Roman Abramovich ដែល​រួមមាន Champions League ២លើក​រដូវ​កាល​នេះ និង​ឆ្នាំ២០១២ បូករួម​ទាំង Europa League ២លើក​នៅ​ឆ្នាំ២០១៣ និង ២០១៩​។ Kai Havertz ក្លាយជា​កីឡាករ​អាល្លឺម៉ង់​ក្មេង​បំផុត​ ដែល​ស៊ុត​បញ្ចូល​ទី​នៅ​វគ្គ​ផ្តាច់ព្រ័ត្រ Champions League តាំងពី​ឆ្នាំ១៩៩៧ ដែល​ធ្វើបាន​ដោយ Lars Ricken របស់ Dortmund យកឈ្នះ Juventus​។ ​អ្នកចាំទី Chelsea, Edouard Mendy រក្សាទី​មិនអោយ​មាន​គ្រាប់​បាល់ ៩ ក្នុងចំណោម ១២ប្រកួត​នៅ UCL រដូវ​កាល​នេះ​ស្មើនឹង​ស្ថិតិ​របស់ Santiago Canizares របស់ Valencia រដូវ​កាល ២០០០-០១ និង Kaylor Navas របស់ Real Madrid រដូវ​កាល ២០១៥-២០១៦​។​

​ងាក​មក Manchester City វិញក៏បាន​ក្លាយជា​ក្លិប​អង់គ្លេស​ទី៩ ផ្សេងគ្នា​ដែល​ឡើង​វគ្គ​ផ្តាច់ព្រ័ត្រ European Cup រឺ UEFA Champions League ហើយ​ច្រើនជាង​ក្លិប​ប្រទេស​ផ្សេង​ដែល​រួមមានអាល្លឺម៉ង់ និងអ៊ីតាលី​ត្រឹម ៦ក្លិប​។ Pep Guardiola ក៏​ស្គាល់​រសជាតិ​បរាជ័យ​នៅ​វគ្គ​ផ្តាច់ព្រ័ត្រ​លើកដំបូង​ដែរ ​ក្នុងនាម​ជា​អ្នកចាត់ការ Manchester City និង​ជា​លើក​ទី២ ក្នុង​អាជីព​បន្ទាប់ពី​ចាញ់​លើកដំបូង​នៅ​ឆ្នាំ២០១១ វគ្គ​ផ្តាច់ព្រ័ត្រ Copa del Rey៕

​អត្ថបទ​៖​នាង សុភា​វុ​ធ