ប្រធានាធិបតីកូរ៉េខាងត្បូង លោក Yoon Suk Yeol បានលើកឡើង កាលពីថ្ងៃពុធ (ទី២០ ខែកញ្ញា) ថា ទំនាក់ទំនងយោធា រវាងរុស្ស៊ី និងកូរ៉េខាងជើង បង្កការគំរាមកំហែងដល់ប្រទេសអ៊ុយក្រែន និងកូរ៉េខាងត្បូងដូចគ្នា។

លោក Yoon បានថ្លែងថា៖ «ប្រសិនបើកូរ៉េខាងជើងទទួលបានព័ត៌មាន និងបច្ចេកវិទ្យាដែលចាំបាច់ ដើម្បីបង្កើនសមត្ថភាព WMD (អាវុធមហាប្រល័យ) របស់ខ្លួន ជាថ្នូរនឹងការផ្ដល់សព្វាវុធទូទៅដល់ប្រទេសរុស្ស៊ីនោះ កិច្ចព្រមព្រៀងនេះនឹងក្លាយជាការបង្កហេតុដោយផ្ទាល់ ដែលគំរាមកំហែងដល់សន្តិភាព និងសន្តិសុខមិនត្រឹមតែលើប្រទេសអ៊ុយក្រែនប៉ុណ្ណោះទេ តែថែមទាំងលើប្រទេសកូរ៉េខាងត្បូងផងដែរ»។

សូមបញ្ជាក់ថា ការអត្ថាធិប្បាយរបស់លោក Yoon នេះ ត្រូវបានធ្វើឡើងក្នុងសុន្ទរកថារបស់លោក នៅឯមហាសន្និបាតអង្គការសហប្រជាជាតិ ខណៈដែលលោកបានរំលឹកឡើងវីញពីដំណើរទស្សនកិច្ចឆ្នាំ២០២២ របស់លោកទៅកាន់ទីក្រុងគីវ និងបានសន្យាផ្តល់ប្រាក់ចំនួន ៣០០លានដុល្លារ សម្រាប់កិច្ចប្រឹងប្រែងកសាងឡើងវិញ នៅប្រទេសអ៊ុយក្រែន ក្នុងឆ្នាំខាងមុខនេះ។

ជាមួយគ្នានេះ មេដឹកនាំកូរ៉េខាងត្បូងរូបនេះ ក៏បានបន្ថែមដែរថា កម្មវិធីនុយក្លេអ៊ែរ និងមីស៊ីលរបស់កូរ៉េខាងជើង បង្កជាបញ្ហាប្រឈមដល់សន្តិភាពនៃតំបន់ឥណ្ឌូ-ប៉ាស៊ីហ្វិកកាន់តែធំឡើង និងនៅទូទាំងពិភពលោក៕