ព្រះបរមរាជវាំងរបស់ប្រទេសម៉ារ៉ុក កាលពីថ្ងៃពុធ (ទី២០ ខែកញ្ញា) បានឲ្យដឹងថា ប្រទេសនេះ គ្រោងនឹងចំណាយប្រាក់យ៉ាងហោចណាស់ ១២០ពាន់លានឌៀហាម (១១,៧ពាន់លានដុល្លារអាមេរិក) នៅក្នុងផែនការកសាងឡើងវិញរយៈពេល ៥ឆ្នាំខាងមុខ ក្រោយគ្រោះរញ្ជួយដី។

សូមរំលឹកថា រញ្ជួយដីកម្រិត ៦,៨វ៉ិចទ័រ បានវាយប្រហារប្រទេសម៉ារ៉ុក កាលពីថ្ងៃទី៨ ខែកញ្ញា ដោយបានឆក់យកជីវិតមនុស្សជាង ២.៩០០នាក់ ដោយភាគច្រើនជាប្រជាជននៅក្នុងបណ្ដាភូមិ ដែលលំបាកទៅដល់នៃតំបន់ភ្នំ High Atlas។

បន្ទាប់ពីមានការប្រជុំរបស់ព្រះមហាក្សត្រ Mohammed VI ជាមួយមន្ត្រីរដ្ឋាភិបាល និងកងទ័ពរួចមក ព្រះបរមរាជវាំងនៃប្រទេសនេះ បានឲ្យដឹងថា ផែនការនេះនឹងកំណត់គោលដៅលើប្រជាជនចំនួន ៤,២លាននាក់ នៅក្នុងខេត្តដែលរងគ្រោះខ្លាំងជាងគេ ដូចជាខេត្ត Al Haouz, Chichaoua, Taroudant, Marrakech, Ouarzazate និង Azizlal។

ព្រះបរមរាជវាំងបានបញ្ជាក់នៅក្នុងសេចក្តីថ្លែងការណ៍ថា ផែនការនេះគ្របដណ្តប់លើការជុសជុលលំនៅឋានឡើងវិញ និងស្ថាបនាហេដ្ឋារចនាសម្ព័ន្ធឲ្យប្រសើរឡើងវិញតាមវិធី ដែលអំណោយផលដល់ការអភិវឌ្ឍន៍សង្គម និងសេដ្ឋកិច្ច នៅក្នុងតំបន់ ដែលរងគ្រោះដោយរញ្ជួយដីនេះ៕