ភ្នំពេញ ៖ ប្រធាននាយកដ្ឋានសុខភិបាលផ្គត់ផ្គង់ភស្ដុភា នៃគណៈកម្មាធិការយោធាមជ្ឈឹមរបស់ចិនលោក Wang Shuqian បានថ្លែងថា សមយុទ្ធសុខាភិបាលយោ ដែលមានឈ្មោះថា«ទេវតាសន្ដិភាព ២០២៣» ដែលធ្វើឡើងរវាងកងទ័ពកម្ពុជា-ចិន បានបង្ហាញភាពជោគជ័យមួយទៀត សម្រាប់គោលគំនិតមនុស្សធម៌អន្ដរជាតិ តែងតែប្រកាន់ភ្ជាប់នូវគោលការណ៍ គោរពគ្នាទៅវិញ ទៅមក។

ក្នុងឱកាសអញ្ជើញជាអធិបតីក្នុងពិធីបិទវគ្គសមយុទ្ធសុខាភិបាលយោធា«ទេវតាសន្ដិភាពឆ្នាំ២០២៣» ជាមួយ ឯកឧត្តមឧបនាយករដ្ឋមន្ដ្រី ទៀ សីហា រដ្ឋមន្ដ្រីក្រសួងការពារជាតិ នាថ្ងៃទី២១ ខែកញ្ញា ឆ្នាំ២០២៣ នៅបញ្ជាការដ្ឋានទ័ពពិសេស កងទ័ពជើងគោក ស្ថិតនៅខណ្ឌកំបូលរាជធានីភ្នំពេញ លោក Wang Shuqian បានឲ្យដឹងថា សមយុទ្ធរួមគ្នានាលើកនេះ គឺជាលំហាត់រួមគ្នាលើកដំបូងដែលបានប្រើប្រាស់យន្តហោះសង្គ្រោះបន្ទាន់ សម្ភារៈសុខាភិបាលជាច្រើនទៀត រួមអទាំងកងទ័ពនៃប្រទេសទាំងពីរជាច្រើននាក់ផងដែរ។

លោកឧត្តមសេនីយ៍ទោ បានបញ្ជាក់ថា «ការរៀបចំសមយុទ្ធរួមគ្នានេះប្រកបដោយភាពជោគជ័យ គឺជាការបង្ហាញភាពជោគជ័យមួយទៀតសម្រាប់គោលគំនិតមនុស្សធម៌អន្តរជាតិ ក៏ជាលទ្ធផលប្រកបដោយផ្លែផ្កា ដែលចិននិងកម្ពុជា តែងតែប្រកាន់ខ្ជាប់នូវគោលការណ៍ការគោរពគ្នាទៅវិញទៅមក សមភាព និងទំនុកចិត្តគ្នាទៅវិញទៅមក ពង្រឹងកិច្ចសហប្រតិបត្តិការជាក់ស្ដែងឱ្យកាន់តែស៊ីជម្រៅ និងបង្កើនចំណងមិត្តភាព ដែកថែប ដែលទាំងនេះទទួលបានការគាំទ្រពេញទំហឹងនិងការបង្ហាញពីភាពយកចិត្តទុកដាក់របស់ថ្នាក់ដឹកនាំ ភ្នាក់ងារគ្រប់លំដាប់ថ្នាក់ និងភាគីពាក់ព័ន្ធនៅក្នុងប្រទេសកម្ពុជា ហើយក៏មិនអាចកាត់ផ្តាច់ចេញពីកិច្ចសហប្រតិបត្តិការយ៉ាងសកម្មនៃវត្តមានាយទាហានក្នុងលំហាត់រួមគ្នាលើកនេះ និងមានការធានាដ៏រឹងមាំ ពីអង្គភាពពាក់ព័ន្ធជាដើម»។

លោកឧត្តមសេនីយ៍ចិនរូបនេះបានបន្ថែមទៀតថា សមយុទ្ធរវាងកងទ័ពទាំងពីរនេះ ជាពិសេស គឺភាពរួសរាយរាក់ទាក់ ការបើកចំហ ការយកចិត្តទុកដាក់ អាកប្បកិរិយាដ៏ ម៉ឺងម៉ាត់ ស្តង់ដារវិជ្ជាជីវៈ ភាពម៉ត់ចត់ និងស្មារតីសហការរបស់ភាគីកម្ពុជា បានធ្វើឱ្យយើងបន្សល់ទុកនូវការចងចាំដ៏សែនជ្រាលជ្រៅ ដែលទាំងនេះជាចំណុចល្អសម្រាប់យើងទាំងអស់គ្នាយកមកសិក្សា និងកចងក្រងជារៀងរហូត។

បើតាមលោកឧត្តមសេនីយ៍ទោ ប៉ែន សុក្រិត្យវិទ្យា នាយលេខាធិការដ្ឋានសេនាធិការចម្រុះ និងជាប្រធានក្រុមការងារចាត់ចែងទូទៅ និងដឹកនាំសមយុទ្ធ បានលើកឡើងថា ឆ្លងកាត់ការហ្វឹកហ្វឺនរួមគ្នាអស់រយៈពេល៨ថ្ងៃ នាយទាហាន នាយទាហានរងពលទាហានចូលរួមសមយុទ្ធ បានធ្វើការសហការយ៉ាងជិតស្និត និងស្មោះត្រង់ រួមគ្នាខិតខំប្រឹងប្រែង បានធ្វើឱ្យសមយុទ្ធហ្វឹកហ្វឺនរវាងកងទ័ពទាំងពីរនេះបញ្ចប់ទៅប្រកបដោយភាពជោគជ័យ យ៉ាងត្រចះត្រចង់។

លោកឧត្តមសេនីយ៍ ប៉ែន សុក្រិត្យវិទ្យា បានបន្ដទៀតថា សមយុទ្ធហ្វឹកហ្វឺននាពេលនេះ កម្លាំងទ័ពចូលរួមហ្វឹកហ្វឺន នៃភាគីទាំងពីរកម្ពុជា-ចិន សរុបចំនួន ៧២១នាក់ ភាគីកម្ពុជាចំនួន ៥៩៥នាក់ ភាគីចិនចំនួន ១២៦នាក់ ដោយប្រើប្រាស់នូវ យន្តហោះសង្គ្រោះសុខាភិបាលប្រភេទY-9 ចំនួនយន្តហោះប្រភេទ Y-20 ឧទ្ធម្ភាគចក្រប្រភេទ Mi-17 ឧទ្ធម្ភាគចក្រប្រភេទ Z-9 រថយន្តសុខាភិបាល ដែលមានរថយន្តបង្ការជំងឺឆ្លងលទ្ធភាពខ្ពស់ រថយន្តសង្គ្រោះសម្ពាធទាប និងបរិក្ខាសុខាភិបាលបម្រើការក្នុងសមយុទ្ធមួយចំនួនទៀត បានធ្វើការរៀបចំហ្វឹកហាត់ជាក្រុមរួមគ្នាមានភាពរលូន និងទទួលបាន លទ្ធផលល្អប្រសើរដូចតាមការគ្រោងទុក៕ អត្ថបទ ៖ បាន ចក់