ភ្នំពេញ ៖ ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ក្រុមប្រឹក្សាអភិវឌ្ឍន៍កម្ពុជា ថ្លែងថា ឆ្នាំ២០២៣ ទំហំពាណិជ្ជកម្មនាំចេញពីតំបន់សេដ្ឋកិច្ចពិសេសភ្នំពេញ នឹងកើនលើសពី១,៣ ពាន់លានដុល្លារ។ 

បន្ទាប់ពីអញ្ជើញពិនិត្យបណ្តាក្រុមហ៊ុន និងរោងចក្រក្នុងតំបន់សេដ្ឋកិច្ចពិសេសភ្នំពេញ នៅថ្ងៃទី២១ ខែកញ្ញា ឆ្នាំ២០២៣ ឯកឧត្តម ស៊ុន ចាន់ថុល ថ្លែងថា តាមរយៈទស្សនកិច្ចពិនិត្យវឌ្ឍនភាពនៃដំណើរការក្រុមហ៊ុន និងរោងចក្រនាពេលនេះ សង្កេតឃើញថាក្រោមការយកចិត្តទុកដាក់ពីរាជរដ្ឋាភិបាល តំបន់សេដ្ឋកិច្ចពិសេសភ្នំពេញបានរួមចំណែកធ្វើឲ្យអ្នកវិនិយោគធំៗទទួលបានជោគជ័យ ហើយបានពង្រីកទំហំវិនិយោគបន្ថែម ដូចជាការសាងសង់រោងចក្របន្ថែមដែលផ្តល់ឱកាសការងារជូនប្រជាពលរដ្ឋ។ 

ឯកឧត្តម ស៊ុន ចាន់ថុល បញ្ជាក់ថា ផ្អែកលើវឌ្ឍនភាពវិជ្ជមានរបស់អ្នកវិនិយោគ ទើបធ្វើឲ្យទំហំពាណិជកម្មនាំចេញពីតំបន់សេដ្ឋកិច្ចពិសេសភ្នំពេញបនកើនឡើង និងត្រូវបានរំពឹងថាឆ្នាំ២០២៣ នឹងកើនលើសពីចំនួនជាង ១,៣ ពាន់លានដុល្លា បើធៀបនឹងឆ្នាំ២០២២។ 

ឯកឧត្តម ស៊ុន ចាន់ថុល លើកឡើងថា កត្តានាំឲ្យមានទំហំពាណិជ្ជកម្មនាំចេញកើនឡើង ដោយសារសង្វាក់ផលិតកម្មក្ន្ងរោងចក្រកាត់ដេរនោះមានភាពទំនើប ដែលប្រើប្រព័ន្ធស្វ័យប្រវត្តិលើមុខងារជាច្រើន មិនថាទាំងក្រុមហ៊ុនកាត់ដេរសំលៀកបំពាក់ និងក្រុមហ៊ុនផលិតគ្រឿងផ្គុំ និងគ្រឿងអេឡិកត្រូនិក។ 

ឯកឧត្តមបន្ថែមថា ចំណុចវិជ្ជមានដែលការទាក់ទាញអ្នកវិនិយោគបាន ផ្អែកកលើសុខសន្តិភាពស្ថេរភាពនយោបាយ ស្ថេរភាពម៉ាក្រូ និងស្ថេរភាពលើការចរាចរណ៍សាច់ប្រាក់ មួយវិញទៀតច្បាប់ពីនយោបាយកម្ពុជា បានបើកទូលំទូលាយមិនមានការរឹតត្បិត ឬហាមឃាត់អ្នកវិនិយោគចង់បណ្ដាក់ទុនលើវិស័យណាមួយនោះទេ៕ ដោយ ៖ ឧត្ដម