នាវាដឹកទំនិញ «Resilient Africa» (អាហ្វ្រិកដ៏រឹងមាំ) បានទៅដល់ច្រកសមុទ្រ Bosphorus របស់ប្រទេសទួរគីហើយ នៅថ្ងៃព្រហស្បតិ៍ (ទី២១ ខែកញ្ញា) នេះ ពោលគឺជាកប៉ាល់ទី១ ដឹកគ្រាប់ធញ្ញជាតិពីអ៊ុយក្រែន ដែលបើកចូល និងចេញ ក្នុងសមុទ្រខ្មៅ ដោយប្រើច្រករបៀងបណ្តោះអាសន្ន។

ក្រុងគីវ បាននិយាយថា កប៉ាល់នេះបានចាកចេញពីកំពង់ផែ Chornomorsk របស់អ៊ុយក្រែន ក្នុងសប្តាហ៍នេះ ជាមួយនឹងគ្រាប់ធញ្ញជាតិ ៣.០០០តោន។

អ៊ុយក្រែនកាលពីខែមុនបានប្រកាសពីការមាន «ច្រករបៀងមនុស្សធម៌» ដើម្បីបញ្ចេញកប៉ាល់ទៅកាន់ទីផ្សារអាហ្រ្វិក និងអាស៊ី និងដើម្បីចៀសវាងនូវការបិទជាក់ស្តែង បន្ទាប់ពីរុស្ស៊ីបានដកខ្លួនចេញពីកិច្ចព្រមព្រៀង នៅរដូវក្តៅនេះ ដែលជាកិច្ចព្រមព្រៀងបានជួយធានាដល់ការនាំចេញរបស់ខ្លួន អំឡុងពេលមានសង្រ្គាមនេះ៕