ហ្គីណេ៖ មេដឹកនាំយោធារបស់ប្រទេសហ្គីណេ លោក Mamady Doumbouya បានប្រាប់មហាសន្និបាតអង្គការសហប្រជាជាតិកាលពីថ្ងៃព្រហស្បតិ៍ (២១ កញ្ញា) ថា គំរូលទ្ធិប្រជាធិបតេយ្យរបស់លោកខាងលិច មិនដំណើរការសម្រាប់ទ្វីបអាហ្រ្វិកទេ ដូចដែលបានបង្ហាញដោយរលកនៃរដ្ឋប្រហារនាពេលថ្មីៗនេះ។

លោកបានប្រាប់បណ្ដាមេដឹកនាំពិភពលោក ដែលប្រមូលផ្តុំគ្នានៅទីក្រុងញូវយ៉ក សហរដ្ឋអាមេរិក ថា «អាហ្វ្រិកកំពុងទទួលរងនូវគំរូអភិបាលកិច្ច ដែលត្រូវបានដាក់លើទ្វីបមួយនេះ។ វាជាគំរូល្អ និងមានប្រសិទ្ធភាពសម្រាប់តែប្រទេសលោកខាងលិចប៉ុណ្ណោះ ប៉ុន្តែវាមានការពិបាកក្នុងការសម្របខ្លួនទៅនឹងការពិត ទំនៀមទម្លាប់ និងបរិស្ថានរបស់អាហ្វ្រិកជាខ្លាំង»។

លោក Doumbouya បានឡើងកាន់អំណាចក្នុងរដ្ឋប្រហារក្នុងឆ្នាំ២០២១ ដែលជារដ្ឋប្រហារមួយក្នុងចំណោមរដ្ឋប្រហារទាំងប្រាំបីនៅអាហ្វ្រិកខាងលិច និងកណ្តាលក្នុងរយៈពេលបីឆ្នាំចុងក្រោយនេះ។ ប្រទេសម៉ាលី នីហ្សេ ប៊ូគីណា-ហ្វាសូ ឆាដ និងហ្គាបុង ក៏គ្រប់គ្រងដោយក្រុមមន្ត្រីយោធាផងដែរ។ 

រដ្ឋប្រហារទាំងនោះ ត្រូវបានថ្កោលទោសយ៉ាងខ្លាំងដោយអង្គការសហប្រជាជាតិ និងមហាអំណាចលោកខាងលិច ដូចជាសហរដ្ឋអាមេរិក និងបារាំង ជាដើម ដែលបានជំរុញឱ្យមានការស្តារលទ្ធិប្រជាធិបតេយ្យឡើងវិញឱ្យបានឆាប់តាមដែលអាចធ្វើទៅបាន។ លោក Doumbouya បានរិះគន់ការឆ្លើយតបរបស់ពួកគេដោយនិយាយថា វាជាការរើសអើងជាតិសាសន៍ និងដាក់សម្ពាធយ៉ាងខ្លាំងលើការគ្រប់គ្រងប្រទេស៕